annaassiniaaneq
Aalisariut 27 tonsinik useqartoq Qalasersuup Kujataani sikup peqqutigisaanik unittooqqasoq
Taamaasilluni Amerikarmiut sikunik aserorterutaat atorneqaqqittariaqalerpoq. Aalisariummi sikumi meterinik pingasunik issutigisumi unittooqqavoq
Australiamiut aalisariutaat Qalasersuup Kujataani sikup peqqutigisaanik unittooqqanerata pissutigisaannik amerikarmiut sikunik aserorteritertik aallartippaat ikiuiartorlutik.
Umiarsuaq Antarctic Chieftain 63 meterinik angissuseqarpoq 27-nik ilaasoqarluni. Sikusimanera peqqutaalluni unittooqqavoq marlunngormalli. Umiarsuup sarpii sisamaapput, sikumiillu pingasut aserorsimallutik.
Sikunik aserorterut Polar Star sisamanngorpat aatsaat tassunga pisinnaassasoq naatsorsuutigineqarpoq. Angalaneq aamma ajornanngitsuinnaanngilaq. Umiarsuarmi aserorterut 500 kilometerini angalaqqaassaaq, kiisalu 15 kilometerini sikusimasumi aamma umiarsuaq unittooqqasoq tikissallugu.
- Annaassiniarneq nalinginnaanngitsuunngilaq, Polar Starimi umiarsuup naalagaa Matthew Walker oqarpoq.
- Antarctic Chieftainili tikinnissaa naatsorsuutigaarput, oqarpoq.
Polar Star USA-mi kisiartaalluni sikunik aserorterisinnaavoq, Qalasersuup Kujataani angalasinnaalluni. Umiarsuaq unittooqqasoq ukiut tamangajaasa umiarsuit unittoorfigisartagaanni 'Operation Deep Freeze'-mi taaguutilimmiippoq.
Polar Star ukioq kingulleq assingusumik suliaqarpoq. Russit ilisimasassarsiortut sikumi unittoorput, ikiuiartoraluartullu Kinameersut aamma unittoorlutik.
- Qalasersuup Kujataata imartaa imaannaanngitsorsuuvoq. Amerikarmiut sikumik aserorteruteqarnerat taamaammat pingaaruteqarpoq, Qalasersuup Kujataami soqutineqariartuinnavippoq, amerikap imartaani alapernaarsuisuni pisortaq Charles Ray oqarpoq.
New Zealandimi oqartussaasut suleqatigalugit annaassiniartoqarpoq. Umiarsuaq kaanngartinneqariarpat aamma kalinneqartariaqarpoq.