Aalisakkerinermik suliffeqarfissuaq RAL-ip suleqataanik inagiiniartoq
Islandimi aalisakkerinermik suliffeqarfissuup Samherjip, Royal Arctic Linep suleqataani Eimskipimi piginneqataassutini annertusisimavai, maannalu 30,11 procentimik piginneqataalerluni.
Samherji Holding aktianik pisiaqarsimavoq, maannalu 30,11 procentimik piginneqataalernermigut aktiat sinneruttut, soraarnerussutisiaqalernissamut aningaasaateqarfinnit 50 procent sinnerlugit piginneqataassutigineqartut, pisiarissallugit neqerooruteqarsinnaalerluni.
- Samherjip inatsit atuuttoq naapertorlugu piginneqataasut allat sapaatip akunnerisa sisamat ingerlaneranni neqeroorfiginiarpai, aalisarnermut tunngatillugu nutaarsiassaqartitsivik, undercurrentnews.com, naapertorlugu ilisimatitsissutigineqarsimavoq.
Eqqarsaasersuutit
Samherjimit tigusinissamut neqeroorut qanorpiaq nipeqassanersoq eqqarsaasersuutigineqaqaaq.
Aalisarnermut tunngatillugu nutaarsiassaqartitsivik naapertorlugu, Samherjimi pisortaanerup Bjorgolfur Johannssonip ilisimatitsissutigisimavaa, ”Eimskip Islandip børsiani nalunaarsorneqarsimaannarnissamiut naleqquttuuvoq. Neriuutigaarput annertuunik annikinnerusunillu piginneqataasut taamatut upperinninnitsinnut tapersiissasut Eimskipillu ukiuni aggersuni ineriartortinneqarneranut suli tapersersuissasut”.
Samherji Ltd., 1983-imi pilersinneqartoq Islandimi aalisakkeriviit annersaasa ilagaat. Samherji aalisariutinik, aalisakkerivinnik aalisakkanillu tukertitsivinnik ingerlataqarpoq.