Aalisakkat Danmark avaqqullugu avammut tunineqarsinnaapput

Kalaallit suliffeqarfiutaat aalisakkat aamma qaleruallit nunanut allanut nioqqutigisinnaanerinut aporfissaqanngilaq.

Qanoq iliornikkut aalisakkat Danmarkikkoorteqqaanngikkaluarlugit nunanut allanut niuerutigineqarsinnaanersut, Partii Naleqqami ilaasortap Anthon Frederiksenip apeqqutigaa.

Suliffeqarnermut Niuernermullu Naalakkersuisoq Hans Enoksen (PN) akissuteqaammini Royal Greenland aamma Polar Seafood paasiniaaffigisimavai.

- Imatut oqaatigalugu nunanik allanik toqqaannartumik niueqatigiinnissamut tamatigoortitanik aporfissaqanngilaq, taamaattorli tunngavigisassat arlallit inissisimassariaqassapput, taanna parteeqatiminut taama akissuteqarpoq.

- Assersuutigalugu aalisakkanik kinguppannillu tunisassianik avammut nioqquteqarnerni nunani avammut nioqquteqarfiusuni
pisortanit suliffeqarfimmik akuersissuteqartoqarajuttassaaq. Pineqartut ilaatigut tassaapput illut qerititsivittallit, umiarsuarnik usilersuinernut atorneqartartut Kinamit, Ruslandimit allaniillu akuersissutigineqartarnissaat.

Danmarkimi suliareqqiineq

Nunap avammut niuerutigisaat 94 procentii aalisakkaninngaanneerlutillu qalerualinninngaanneersuupput. Aalisakkat ilaatigut EU-mut, Japanimut Kinamullu nassiussorneqartartut, Hans Enoksenip (PN) paasissutissiaraa. Apeqqutillu ilaat ulluni kingullerni eqqartorneqangaatsiartoq kingorna tikkuarpaa.

- Avammut nioqquteqarnerup taassuma ilaa Danmarkimut pisarpoq, tamaani suliareqqiinissaq, kingornatigullu nunanut allanut avammut nioqquteqarnissaq siunertarineqarlutik, Hans Enoksen (PN) allappoq.

Kalaallit Nunaat 2014-miilli aalisakkanik qalerualinnillu EU-mi ilaasortatut avammut niueruteqarsinnaalluni EU-mut isumaqatigiissuteqarsimasoq, taassuma ilanngullugu paasissutissiaraa.