Aalisakkat avammut tunisat nalingi apparujussuarsimasut
Ukioq 2020 aalisarnermut ajorluinnarsimavoq, aalisakkammi pingaaruteqarnerpaat kiilumut akii apparsimagamik.
2020-mi aalisakkat qaleruallillu avammut tunisat nalingi ataatsimut isigalugit katillugit 4.761 millioner koruuniusimapput. Ukiup siulianut sanilliullugit 307 millioner koruuninik annikinnerupput, annikilleriarnerlu katillugu 6,1 procentiulluni, Naatsorsueqqissaartarfimmit ilisimaitsissutigineqarpoq.
Naatsorsueqqissaartarfiup aalisarnermi avammut tunisatigut annaasaqarfigineqarsimasut naatsorsorsimavai, avammut tunisat katillugit 4.761 millioner koruuninik isertitaqaataasimapput. Naatsorsuinermi pineqartumi puisit, savat uumasullu allat tunineqarsimasut nalingi ilaatinneqanngillat.
Kiilumut akigititat appariangaatsiarsimasut
Nunanut allanut tunisaasartut pingaarnerit nalingisa apparnerat tunisat akimikkut appariarsimanerannik pissuteqarpoq.
2019-imut sanilliullugu 2020-mi kiilumut akigititat imatut appariaateqarsimapput:
Raajat: -15,1 procent imaluunniit 6,13 kr.
Saarulliit: -6,2 procent imaluunniit 1,68 kr.
Qalerallit: -7,8 procent imaluunniit 3,02 kr.
Akigitiat paariasaarsimannerannut nassuiaatigineqarpoq, coronap nunarsuarmi tuniluunnerata malitsigisaanik neriniartarfiit, kantiinat neriniartarfiillu allat matusimanerat, tamatumalu kinguneranik aalisakkanit tunisassiat sinneqangaatsialersimapput akit apparnerannik nassataqartumik.
Qaammammiit qaammammut
Decembarip qaammataani ukioq naalersoq raajat saarulliillu akiisa apparsimanerat kiilumut akigititat naatsorsorneranni, ukioq naallugu akit agguaqatigiissillugit apparsimanerannit annertunerupput, tamanna tabelimi tulliuttumi takuneqarsinnaavoq: