Aalisakkat avammut tunisat ikileriarujussuartut
Aalisakkanit tunisassiat avammut tunineqarsimasut nalingi 2020-p ukiuata affaani siullermi 303 millioner koruuninik appariarsimasut, Kalaallit Nunaanni Naatsorsueqqissaartarfiup kisitisaataasa kingulliit takutippaat.
2020-p ukiuata affaani siullermi aalisarnermit avammut tunineqarsimasut naatsorsorneqarnerisa takutippaat, avammut tunisat nalingi appariarujussuarsimasut.
Nunanut allanut tunisaasartut pingaarnerit nalingisa apparnerat tunisakinnerulernermik aammalu tunisat akimikkut appariaallassimanerannik pissuteqarpoq. Kalaallit Nuaanni Naatsorsueqqissaartarfik allappoq.
Ukiup qaammataani arfinilinni siullerni aalisakkanit tunisassiat avammut tunineqartut nalingi 303 millioner koruuninik apparlutik, maanna 1.978 millioner koruuniupput.
Tunisat appariarnerat 13.3 procentiuvoq.
Raajat avammut tunineqarsimasut 206 mio. koruuninik nalikinnerulersimapput.
Coronap ajornartorsiortitsinerata aalisakkanit tunisassiat nunarsuarmi akigititanut sunniuteqarsimanera pissutaalluni avammut tunisat ikileriarsimapput
Naatsorsueqqissaartarfimmit siusinnerusukkut nalunaarutigineqarsimavoq, raajanut akigititat appariarujussuarsimasut. Avammullu tunisat naatsorsorneqarsimanerisa takutippaat, raajat tunineqarsimasut nalikillinerpaasimasut.
Tassa raajat avammut tunisat nalingi 206 millioner koruunit missaannik nalikillisimapput. Saarulliit 60 millioner koruuninik nalikillisimapput qalerallillut 48 millioner koruuninik nalikillisimallutik. Aalisakkat alla 11 millioner koruuninik naleqarnerulersimaput.
Avammut tunineqarsimasut ikileriarneri pingaartumik apriilip, maajip juunillu qaammataanni pisimapput, piffissani taakkunani avammut tunisat qaammammut agguaqatigiissillugu 106 millioner koruunit nalingannik annikilleriartarsimapput.