Aningaasanut inatsit
Aalisakkat akigissaarnerat akitsuutillu landskarsimut sinneqartooruteqartitsipput
Naalakkersuisut 2015-imut missingersuutitigut ilassutitut aningaasaliissutissat ilanngullugit 73 millioner koruuninik amigartooruteqassamaaraluarput, naatsorsuutigisamilli pitsaanerujussuarmik angusaqarput 137 millioner koruuninik sinneqartooruteqarlutik
Landskarsip 2015-imut naatsorsuutaata naatsorsoqqinneqarnerat naammasseqqammerpoq. Namminersorlutik Oqartussat avataanit kukkunersiuisuata Deloittep, Landskarsip naatsorsuutai uparuagassaqartinnagit tunniuppai, Namminersorlutik Oqartussat tusagassiorfinnut nalunaarutikkut paasissutissiipput.
Naatsorsuutini takuneqarsinnaavoq landskarsi 2015-imi DA-kut 137 millioner koruuninik sinneqartooruteqarsimasoq. Missingersuutinullu sanilliullugu nikingassutaa angeqaaq.
– 2015-imut missingersuutigisimavarput 73 millioner koruuninik amigartooruteqassalluta, ilassutitut aningaasaliissutit ilanngullugit. Allatut oqaatigalugu: Nikingassutaa 120 millioner koruunit, Naalakkersuisut nalunaarput.
Aalisakkanut akitsuutinit isertitat amerleriarput
Namminersorlutik Oqartussat naapertorlugit landskarsip taama angusarissaartigineranut pissutaasut amerlapput. Pissutaasut pingaarnerit ilagaat 2015-imi aaliakkat akigissaarnerat, minnerunngitsumillu qaleralinnut raajanullu akitsuutinit isertitat amerleriarluarsimapput.
Tulliatullu Nuummi parnaarussivimmik umiarsualivimmillu sanaartornermut aningaasaliissuterpassuit landskarsimut pingaaruteqarsimapput, tassani ingerlatsiviit suliaqarnerulermata, akileraarutinit akitsuutinillu amerlanerusunik isertitsissutaasumik.
– Landskarsip naatsorsuutitigut angusaa naammagisimaarnartorujussuuvoq. Angusap aamma nuannaarnartumik takutippaa pisortani aningaasanik aqutsisinnaanerput pitsanngoraluttuinnartoq, aningaasaqarnermut aatsitassanullu naalakkersuisiq Randi Vestergaard Evaldsen nuannaarluni tusagassiorfinnut nalunaarummi oqarpoq.
Aningaasaqarnikkut unammilligassat qaangerneqanngillat
Aningaasaqarnermut aatsitassanullu naalakkersuisoq naapertorlugu landskarsip angusarissaarnera isumaqanngilaq siunissami aningaasaqarniarnikkut unammilligassat qaangerneqartut, taamaasillutalu aningaasanik, ullumikkuminngarnit amerlanerusunik atuisinnaalersugut. Unammilligassat suli taakkuupput.
– Naluneqanngitsutut aalisagaatitta akii nikerartartorujussuupput. Maanna qujanartumik akigissaarput, akiili appariataarsinnaapput taamaasippallu landskarsip aalisarnermit isertitai ikiliartulissapput. Innuttaasullu katitigaanerisigut utoqqaat, inunnit sulisinnaasunit amerlanerujartuinnarisigut unammilligassaq suli taannaavoq. Taamaattumik ingerlataq maanaannaq unitsissinnaanngilarput aningaasanillu amerlanerusunik atuilerluta. ´Sumorsuaq tamaviaarnissamik´ aqqut attatiinnassavarput, Randi Vestergaard Eveldsen oqarpoq.
Landskarsip 2015-imut naatsorsuutai Inatsisartunit akuersissutigineqassapput. Naatsorsuutigineqarpoq Inatsisartuni siullermeerlugu oqallisigineqassasoq maalip 27-anni - aappassaaneerneqassaarlu ukiakkut ataatsimiinnermi.