Aalisakkanut akitsuutit isaatitsilluarput

Aalisakkanit pisuussutinut akitsuutiniit Nunatta karsianut isertinneqartut 2018-imi aatsaat taama amerlatigipput

Aalisarneq nunatta avammut nioqqutissatut inuussutissarsiutitut pingaarnersariinnanngilaa; aalisakkanulli akitsuutit nunatta karsianut aamma iluaqutaalluartarput.

2018-imi aalisakkat akitsuutaannit isertitat 426 milliuunit koruuniupput (kisitsisaagallartut), aatsaallu taama amerlatigaat. Tamanna aningaasaqarnikkut ingerlatsineq pillugu nalunaarummi, Inatsisartunut maajip aallartinnerani saqqummiunneqartussami, atuarneqarsinnaavoq.

Iluanaarutissat 384 milliuunit koruuninut missingersorneqarsimagaluarput.

Iluanaarutinik isertitaqarfiulluarnerpaagallarsimasoq tassaavoq 2017, iluanaarutit nunatta karsianut isertinneqartut 275 milliuunit koruuniullutik. Ukiulli ataatsip ingerlanerinnaani iluanaarutit 150 milliuunit koruuninik qaffariaateqarput.

Ataatsimut isigalugu aningaasanut inatsimmi 2018-imi isertitat 6 procentii sinnerlugit aalisakkanut pisuussutinut akitsuusiinermit isertinneqarsimapput. Taamaattoqarneranili mianersornissamut kaammattuuteqartoqarpoq.

- Taamaattoq pisortat isertitaasa ilarpassui aalisarnermut akitsuutineersinnaanerat aarlerinaateqarsinnaavoq, tassa aalisarneq misilittakkat malillugit piffissap ingerlanerani allanngorarfiusarmat, nalunaarummi allassimavoq.

- 2019-imut aningaasanut inatsimmi ataatsimut 392 milliuunit koruuninik iluanaaruteqartoqarnissaa missingersuusiorneqarpoq.

Powered by Labrador CMS