Aalisakkanik tunitsiviliornissamut qinnuteqaat itigartinneqartoq

Qeqertarsuatsiaani aalisakkanik tunitsiviliornissamut qinnuteqaat Kommuneqarfik Sermersuup Sanarfinermut Avatangiisinullu Ataatsimiititaanit itigartinneqarpoq. Suliniuteqartup aalajangerneq isornartorsiorpaa.

Nunaqarfimmi Qeqertarsuatsiaani aalisakkanik tunitsivik najukkami iluaqutaassagaluarpoq, Kommuneqarfik Sermersuup aqutsisoqarfia naliliivoq.

Kisianni najugaqartut suliniummik tapersersuinissaannik pisariaqartitsivoq. Tusarniaanermi akissutit marluk naapertorlugit taamaattoqanngilaq, tusarniaanermi akissutit marluk nunaqarfimmi aalisakkanik tunitsiviliornissamut qinnuteqaat akerlerimmassuk.

Nuunnguaq Seafood IVS tunitsivimmik sananissamik suliniuteqartuuvoq qinnuteqartuullunilu, kisianni tusarniaanermi akissuteqaammi kommunip qinnuteqaat itigartittariaqaraa, najukkami peqatigiiffik allappoq.

Tusarniaanermut akissuteqaat peqatigiiffimmit suliffeqarfiup ateqataaneerpoq. Tusarniaanermut akissuteqaammi peqatigiiffik angummut suliniuteqartumut arlalinnik pasilliuteqarpoq.

Pasilliutit angutip uppernassusaanut tunngapput.

Aalajangerneq maalaarutigigaa
Qeqertarsuatsiaani nunaqarfimmi aqutsisut aamma qinnuteqaat tapersersunngilaat. Tunitsivik nunaqarfimmi aqutsisut illup allanngutsaaliussallugu kissaatigisaata eqqaani inissisimammat.

Svend Erik Sønderstrup aalisakkamik tunitsiviliornissamik suliniuteqartuuvoq, tunitsiviliornissamullu akerliuneq uggoraa. Ataatsimiititap aalajangernera maalaarutigeqqammerlugu, Sermitsiaq.AG-mut taanna oqaluttuarpoq, aammattaarlu inuit tusarniaarnermi akissuteqartut inuttaanut pasilliuteqartut politiinut nalunaarutiginissai sulissutigalugu.

Nunaqarfimmi saniatigut aalisakkanik tunitsivimmik peqarnissaa, najukkami inuiaqatigiinnut pitsaasortaqartoq, Svend Erik Sønderstrup isumaqarpoq:

- Suliniummut uunga ukiuni tallimani kingullerni annertuumik suliaqarnikuuvunga. Qeqertarsuatsiaat eqqaat Kalaallit Nunaanni saattuaqarnerpaat ilagaat. Saarulleqarlunilu qaleraleqarpoq, Svend Erik Sønderstrup oqarpoq.

Justus: Nunaqarfimmi aqutsisut innersuussutaat aalajangiivoq
Juunimi ataatsimiinnermi Kommuneqarfik Sermersuumi Sanarfinermut Avatangiisinullu Ataatsimiititap Nuunnguaq Seafood IVS-imit qinnuteqaat itigartitsissutigaa.

Ataatsimiititami siulittaasoq, Justus Hansen (D), tusarniaanermi akissuteqaatit taakku marluk akerliunerat aalajangiisuusoq nassuiaavoq.

- Nunaqarfimmi aqutsisut ersarissumik naaggaarput, taakkulu pingaaruteqarput, Justus Hansen Sermitsiaq.AG-mut oqarpoq.

Nunaqarfimmi aqutsisut illup allanngutsaalerusutaasa qanittuani suliniutip inissisimaneranut innersuussilluni, tunitsivimmut naaggaarput.

Suliniut illumut nunaqarfimmi aqutsisut allanngutsaaliorusutaannut ataqqinnittumik ungasissusilimmik malinnittoq, suliap saqqummiunneqarnerani atuarneqarsinnaavoq.

Powered by Labrador CMS