Aalisakkanik tunisassiorfittaarnissamik itigartitsineq mamiagineqarpoq

Suliffeqarfiup Uummannami aalisakkanik tunisassiorfeqalernissamut qinnuteqarnera Naalakkersuisut itigartimmassuk, Atassummi politikkikkut siulittaasup tullianit mamiagineqarpoq. Uggornarluinnarpoq, Atassutip siulittaasuata tullia Nikolaj Rosing taama nalunaaruteqarpoq.

Sigguk A/S-ip Uummannami aalisakkerivimmik pilersitsiniarluni qinnuteqarnera Naalakkersuisunit itigartinneqarpoq. Illoqarfimmi tunisassiorfiit marluunerat tunngavilersuutigineqarpoq.

Itigartitsinermili Naalakkersuisut inuussutissarsiornermi aporfilersuisut, Atassummi politikkikkut siulittaasup tullia, Nikolaj Rosing isumaqarpoq.

- Uggornarluinnarpoq Naalakkersuisut nunatsinni aalisarnerup ineriartortinnissaanut paasinnissimanngimmata. Uummannami Sigguk A/S nutaamik fabrikkiliornissaminut Naalakkersuisuniit itigartinneqarsimapput, nalunaaruteqarpoq.

Uummannami tunisassiorfiit marluupput, Royal Greenland aamma Avannaa Seafood Aps. Tunisassiorfiilli qaleralinniunerusoq tunisassiorfiupput. Illoqarfimmilu aalisartuusut saarullinnik ammassannillu aalisarusupput.

Nassuiaasariaqarput

- Aalisartut saarullippassuarnik pisaqartaraluarlutik tunitsivissaaleqissuttarmatigit. Aalisartut saarullinniarusupput ammassanniarusullutillu Uummannap sulluani nunatsinnullu aningaasaqarnikkut kivitseqataalluarsinnaasumik

- Taamatut aallarnisaaniartunut killilersuiniarneq nunatsinnut innarliivoq piitsuunnguallatsitsillunilu. Kisinneqarsimavormi saarullinniit ukiumut 50 milliuunit koruunit tikillugit kaaviiaartitsisoqarsinnaasoq, tamanna saavitsiinnassavarput , Nikolaj Roring tusagassiutinut nalunaaruteqarluni taama aperivoq, ilanngullugu erseqqissarlugu, Naalakkersuisut ’nassuiaalluartariaqartut’.

Powered by Labrador CMS