Aalisagartassat: EU raajanik amerlanerusunik suluppaakkanillu ikinnerusunik pissarsivoq
Ukioq manna EU-mut pisassiissutit pillugit isumaqatigiissut inissippoq. Suluppaakkat ammassaallu ikinnerusut EU-p pissarsiarissavai, raajartassaalli amerlineqarput. Isumaqatigiissut nunatta karsianut 2023-mi 126,5 millionit koruunit missaannik pissarsiffiussaaq.
Nunarput EU-lu nunatta imartaani 2023-mi EU-p aalisarnissaa pillugu isumaqatigiissuteqarput. Atorfilittat Bruxellesimi novembarip 23-anni 24-annilu 2022-mi isumaqatiginninniartuupput. Naalakkersuisut tusagassiuutinut nalunaarummi taama ilisimatitsipput.
Ilisimatuussutsikkut siunnersuineq pissutigalugu aalisakkanut arlalinnut pisassiissutit ikilineqarput. EU-p suluppaakkat aalisarsinnaasai 310 tonsinik ikilineqarput, Kalaallit Nunaatalu kitaani qaleralittassat 225 tonsinik ikilineqartut.
Taamaakkaluartoq EU nunatta imartaani ukioq mannatut amerlatigingajattunik qaleralittassaqarpoq, Tunumi pisassiissutit 200 tonsinik qaffanneqarmata. Taamatuttaaq Tunumi raajartassat 150 tonsinik amerlineqarput.
Ammassassuit suli nalornissutigineqartut
Nunatta 2022/2023-mi ammassattassai 32.760 tonsiupput, EU-lu 7.760 tonsinik pissarsivoq.
Aalisarnermut isumaqatigiissut malillugu Nunatta EU ammassannik 7,7 procentit angullugit pisassittussaavaa, imaluunniit Kalaallit Nunaata pisassaata ikinnerpaamik 25.000 tonsit pereernerisigut pisassanit sinnerussimasinnaasunit.
EU-p 7.760 tonsit neqeroorutigineqartut aalisarumavai, kisianni ilisimatuussutsikkut siunnersuineq inaarutaasoq aappaagu aalajangersarneqareerpat, pisassiissutit allanngussappata aaqqinneqarsinnaallutik.
EU-p aalisarsinnaanermut pisinnaatitaaffii pillugit isumaqatigiissut nunatta karsianut 98,5 millionit missaannik 2023-mi isertitsissutaassapput, kiisalu EU-mi aalisariutaatillit 2023-mut 28 million koruunit missaanni akiliuteqassasut naatsorsuutigineqarpoq.
Aalisakkanut akiliutigineqartut akitsorsinnaapput EU ammassassuarnik kingusinnerusukkut tamakkiisumik pisassinneqarpat.