Aalborg: Piginneqatigiit peqatigiiffiata kalaallit anisikkusukkai
Aalborgimi attartortitsisartup kalaallit attartortitami anisitaannginnissaat ukiuni marlunni sorsuutigisimavaa. Suliallu maanna eqqartuussivimmi suliarineqarnera kinguneqarluarpoq, kalaallillu attartortut najugaqaannarsinnaanngorlutik.
Kalaallit aalakoortarput, torsuusami quisarput, unnuarsuarmut aalakkuttarput toqqissisimajunnaartitsisarlutillu.
Eqqartuussissuserisut kalaaleq Aalborgimi inaanit Revlingebakkenimiittumi najugalik anisinniarlugu, attartortitsisumut Frank Nygaardimut taamatut allassimapput.
Nutaarsiassaqartitsivik Nordjyske Aalborg taama allappoq.
Frank Nygaardip narrujuummissutigisimavaa, attartortitami ilaat Naalagaaffeqatigiit avannaaneersoq attartornerannik atorunnaarseqqullugu piginneqatigiit peqatigiiffiata sakkortuuliorluni iliuuseqarsimanera.
- Inuit attartortitannik anisitseqqusillutik uannut tatisisimasut ukiut marluk akiorsimavakka, taakku isumaqaramik kalaallit najugaqartut amerlavallaarpata inigisatik nalikillissasut, taanna Sermitsiaq.AG-mut oqarpoq.
Taassuma erseqqissaatigaa, kalaallit attartortut ajornartorsiutiginagit, soorlu attartortut allat aamma ajornartorsiutaanngitsut.
Najugaqartup ataatsip eqqartuussivikkoortinneqarnera
Attartortoq aalajangersimasoq, V-mik taaneqartoq eqqartuussvilersuunneqarsimavoq, nipiliorpallaartartutu piginneqatigiillu peqatigiiffiannut akornusersuisartutut unnerluutigineqarsimalluni. Tamannali itinerusumik tunngaveqartoq, attartortitsisoq Frank Nygaard isumaqarpoq.
- Piginnittut kalaallit pillugut siulersuisunut naammagittaalliorsimapput, siulersuillu taakunannga anisitsiniarsaritilersimavaannga, taanna oqarpoq.
Assigiinngitsunik periuseqarlutik taamaaliorsimapput.
- Sioorasaarutigisimavaat, V-p anisitaanissaa iluatsikkunikku, suliamut aningaasartuutinik akiliisinneqassasunga, aamma attartortitsisutut akursissutiga atorunnaarsinneqassasoq, Frank Nygaard oqarpoq.
- Tamakkua saniatigut viceværti kalaallinik attartortunik malersuitilersimavaat, suminginnguanillu pisoqaraangat assilisarlugit, naammagittaalliuutigisinnaasaminnik, taanna oqaluttuarpoq.
Kommunimik suleqateqartoq
Frank Nygaard ataataminik peqateqarluni Finansieringsselskab A/S-imik piginnittuuvoq, suliffeqarfik Nordjyllandimi inissianik assigiinngitsunik 80-inik piginnittuuvoq, amerlanerit Aalborgimiillutik. Franki inissianik nutaanik pisiaqaraangami, inissianik akisuallaanngitsumik attartortinneqarsinnaasunik pissarsiniartarpoq.
- Inuit aningaasaateqarpallanngitsut immaqalu allanik ajornartorsiutillit inissaannik nassaarniarnermi Aalbor Kommune suleqatigisarpara. Aqqusinermi sullissisartut attartortussat uannut innersuuttarpaat.
Uannut innersuunneqartut aqqusinermi sullissisunik attaveqaateqartarput, sullissisut ajornartorsiortoqaleraanga ornigukkasuarsinnaasarput.
Heidi Bay, Aalborgip Kommuniani aqqusinermi sullissisoq, V-mut attaveqaataasoq, pisoq pillugu Frank Nygaardimut isumaqataavoq:
- Piginneqatigiit peqatigiiffiata Frankl Nygaard anisikkusuppaat, kommunitsinni inunnut atugarliornerpaanut attartortitsisarnera pissutigalugu. Inissiat mikisunnguupput, inuillu nalinginnaasumik sivikitsuinnarmik taakkunani najugaqartarput. Eqqissiviilliortoqartaqaaq, kalaallilli kisimik taamaaliorneqa ajorput, illumi attartortorpassuit ilaannikkooriarlutik aamma eqqissiviilliortitsisarpu, Heidi Bay oqarpoq.
Sermitsiaq.AG-mit piginneqatigiit peqatigiiffiata eqqartuussissuserisuat oqaaseqartinniarneqaraluarpoq, maannamulli iluatsinngitsumik.