assartuineq

Aalborgip Kalaallit Nunaannut assartuineq suli suliniutigaa

Aalborg Havni nutaamik containerisivissuarmik sanalikkersaarpoq RAL-i umiarsualivimmiitiinnarusullugu

Aalborg Havn A/S containerisivissuup kangiatungaaniittumi nutaamik 180.000 kvadratmeterimik annertutigisumik sananissamik pilersaaruteqarpoq.

Containerisivissuup maannamut tigusinnaasai 2022-imi inissaarunnissaat ilimagaat, containerinimmi assartuineq annertusiartuinnarmat, Aalborg Havni taama tunngavilersuivoq.

Atuaruk: RAL: Kalaallit Nunaannut pitsaanerpaasussamik iliussaagut

Aalborg Havnillu Kalaallit Nunaannut assartuineq attatiinnarusuppaat.

- Aalborg Havnip Atlantikup avannarpasissuanut assartuisarneq pingaarnertut ineriartortikkusuppaa aappaattullu Østersømi assartuineq, umiarsualiviup pisortaa Claus Holstein, tusagassiuutinut taama nalunaaruteqarpoq.

Atuaruk: Aalborgimit taarseeqqusissummut RAL oqaaseqarusunngilaq

Qaammatip aallartilaarnerani Aalborgip siunissamut takorluukkatik Royal Arctic Linemut saqqummiuppaat. Islandimiunillu Eimskipimik suleqatigilernissaannut isummersimanerannut allannguutaasinnaasumik saqqummiussisoqanngilaq.

Atuaruk: RAL-ip Aalborgimi umiarsualivimmik suleqateqarnini taamaatippaa

- Takorluukkanut titartartakkannik ilusilersukkanik saqqummiiffigineqarpugut, pisortaaneq Verner Hammeken ataatsimiinnerup kingorna, Sermitsiaq.AG-mut oqarpoq.

RAL-i Eimskipilu assatuinermik suleqatigiissuteqalissapput umiarsualivimmik aallaaveqanngikkaluarlutik.

Suleqatigiinnermi Reykjavikki, Nuuk, Rotterdami kiisalu danskit umiarsualiviat atorneqassapput. Danskit umiarsualiviat Aarhusimiittoq atorneqassamaarpoq.

Powered by Labrador CMS