Aalborgimi viceværti: Nipiliortartut perulluliortartullu kisimik pineqarput
Aalborgimiittumi Revlingebakkenimi viceværti Sermitsiaq.AG-mit attavigineqarsimavoq, V pillugu suliamut atatillugu. Taassuma inissiarsuarnit kalaallit anisinneqarnissaat pineqanngilluinnarnerarpaa.
Piginneqatigiit peqatigiiffiata kalaaleq ataaseq najuqartunut allanut toqqissisimatitsinngittarnera pissutigalugu anisitaanissaa eqqartuussivitsigut ukiuni marlungajanni sulissutigisimavaa.
Arnap pineqartup inigisaanik piginnittoq Frank Nygaard isumaqarpoq, kalaallinut attartortitaanut quliusunut malersuinerusoq, aamma inissiarsuarni kalaallit najugaqarnerat piginneqatigiit peqatigiiffianni amerlanerussuteqartut akerlerigaat, taamatulli oqarnera viceværtip Poul Husumip sakkortuumik akerlilerpaa.
- Ilumoorpoq tamatuma aviisimi allassimanera. Pisumili tamanna pineqanngilluinnarpoq, viceværti oqarpoq.
Angutaataa persuttaasartoq toqqissisimajunnaartitsisarsimasoq
- V taassumalu pulaartorisartagai ima perulluiortartigipput, allaat najugaqartunut allanut toqqissisimajunnaartitsisarlutik, Poul Husum oqarpoq.
- V ukiualuit matuma siornatigut persuttaasartumik aappaqarsimavoq pulaartoqartarsimallunilu perulluliortartunik. Taassumaana pulaartorisartagai ineqarfitsinniisikkusunngikkivut, tamannalu taassuma akisussaaffigaa. Attaveqarfigiuaraluarlugu iluaqutaaneq ajorpoq, taanna oqapoq.
Sermitsiaq.AG-p V oqaloqatigisimavaa, kinaaneralu nalunagu. Taassuma oqaatigaa kammalaatini perulluliorneq ajortut, aamma tamanna eqqartuussivimmi aalajangiisoqarneraigut uppernarsineqarsimasoq. Taanna isumaqarpoq, viceværti ajornartorsiutinik pilersitsisartoq, ammip qalipaataa tunngavigalugu immikkoortitsisarami.
Kalaallit kisiisa immikkoortittarsimanngilai, aammali inuiaat allat taamak pisarsimavai. Viceværtilli aammaarluni kalaallinut akerliunnginnini oqaatigeqqippaa.
Maanna eqqissisimasoqarnerulersimasoq
- Illumi inuit 150-it najugaqarput, perulluliortoqarneranilu eqqissisimajunnaartoqartarnera matumani pineqarpoq. V qaatussimagaangami inutsialaavoq. Kalaaliunera pineqanngivippoq. Kalaalerpassuit allat illumi aamma najugaqarput, taakku ajunngivipput. Ajornartorsiutigineqanngilluinnarput, taanna oqarpoq.
Viceværtip oqaluttuaraa, ajornartorsiutigineqartartut piffissami kingullermi imatut ajornartorsiutaajunnaarsimasut.
- Ilinniagaqarnerata nalaani ajornartorsiuteqartoqarsimanngilaq, angutaataalu persuttaasartoq eqqissisimanerulersimannguatsiarluni, taanna oqarpoq.
Eqqartuussivimmi aalajangiussaq naapertorlugu, V Revlingebakkenimi inigisamini najuagaqaannarnissaut naggammik periarfissinneqarsimavoq. V ukiup tulliuttup ingerlanerani najugaqartunut allanut akornutaasumik akuersaarneqarsinnaanngitsumillu nipilioqqittalissaguni piginneqatigiit peqatigiiffianni anisinneqarsinnaavoq.