kalaallit danmarkimiittut

Aalborgimi akuulersitsiniarnermut siunnersuisoqatigiit kalaallit peqatiserigaat

Kalaallit kommunit akuulersitsiniarnermut siunnersuisoqatigiivinit aamma tusaarniarneqartariaqarput, Aalborgimi taama isumaqarput. DR Nordjylland allappoq.

Kalaallit danskisut innuttaassuseqarput, ikinnerussuteqartulli allat assigalugit inuiaqatigiinni akuullualernissaminnut immikkut aamma ikiorneqartariaqarput.

Aalborgip Kommuniata akuulersitsiniarnermut siunnersuisoqatigiivi taama isumaqarput, Danmarkimilu siullersaallutik kalaallinut siunnersuisoqatigiinni ilaasortaanissamik kajumissaaruteqarput. DR Nordjylland allappoq.

Kalaallit peqatiserineqarnerat isumassarsiatsialaasoq, Anna Lynge, nunatsinnersoq, 2001-imiilli Danmarkimi najugaqartoq taama isumaqarpoq.

Namminermi Danmarkimut tikeqqaarami kulturikkut assigiinngissuterujussuit aqqusaarsimavai, minnerunngitsumik piffissamik pilersaarusiornissamut tunngatillugu.

- Inuusuttuullunga maanga tikikkama maluginiakkama ilagaat Danmarkimi inuiaqatigiit uisakajaarpasillutillu ataqatigiimmik aaqqissuussiniartuusut, isumaqatigiissutillu ullorsiutinut allattugassat isumagisariaqarneri uanga uiasakajaarnartippara, taanna DR Nordjyllandimut oqarpoq.

Taanna isumaqarpoq kalaallit Danmarkimiittut misilittakkaminnik isumassarsiaminnillu saqqummiussinissaminnut periarfissaqalernertik nukittorsaatigissagaat, illuatungaanilu politikerit taakku aamma iluaqutigisinnaassagaat.

- Kalaallit qanoq tunuliaqutaqarnersut takuneqarluarsinnaanngussaaq. Kalaallit kulturiata ilisimasaqarfiginissaa innuttaasunut danskinut kommuninullu iluaqutaasupilussuussaaq, Anna Lynge isumaqarpoq.

Aalborgimi akuulersitsiniarnermut siunnersuisoqatigiit byrådip siuliisa atuuffianni assersuutigalugu inunnik Iranimit, Somaliamit, Afghanistanimit Libanonimiillu aggersunik inuttaqartinneqarput.

Kalaallit Nunaanneersunik peqataasoqarnissaa aamma iluaqutaassasoq, Aalborgimi akuulersitsiniarnermut siunnersuisoqatigiinni maanna siulittaasoq, Mahtab Jalili-Trudslev, taama isumaqarpoq.

Kalaallit Kangia qiterlermiullu ajornartorsiutigisartagaat naligiissivissorneqarsinnaasorinngilai, aporfigisartagaalli tunngaviatigut assigiittut, siulittaasoq naliliivoq:

- Kalaallit Nunaammi Danmarkip ilagaa, taakkua aamma qallunaajupput, taamaakkaluartoq avataaneersuupput maanilu ikinnerussuteqartuullutik, Mahtab Jalil-Trudslev, ilaatigut kalaallit amerlanerusut danskit peqatigiiffiinut peqataalernissaannik anguniagaqartoq, oqarpoq.

- Peqatigiiffilerinermi akuunerunissaat, qitornaasa timersornermut peqataanissaat najugaqarfigisaminnilu aaqqissuussinernut peqataasarnissaat kissaatigaara. Allat peqataaffigisaannut peqataanissaat takorusuppara. Tamannami amigaatigilaarparput, taanna oqarpoq.

Kommunini akuulersitsiniarnermut siunnersuisoqatigiit byrådini politikeritulli ukiuni sisamani atuuttussatut toqqarneqartarput.

Powered by Labrador CMS