Skip to main content

Aalakoortoqarnera pissutaalluni Disko Linep angallassinissaralua unitsinneqartoq

Kommune Qeqertalimmi inunnik isumaginnermik sullissisut Disko Linep angallataanik Aasiannit Kangaatsiamut angalasussat angallassisussamik aalakoortoqarmat aallanngitsoorput ippassaq ataasinngormat. Pisoq Disko Linemit ajuusaarutigineqarpoq

Inunnik isumaginninnermik sullissisut Kangaatsiamut angalasussat Najannguaq Olsvig Sandgreen aamma Sissi Lange Aasianni akunnerni arlaqartuni utaqqisariaqarsimapput.

Kommune Qeqertallip tusagassiutinut nalunaarutaani misigisartik ima oqaluttuaraat:

- Takkukkatta arfineq marlup qeqqalersoq, arfineq marluk qimalaaraa paasitinneqarpugut inuttat pingajuat takkutinngimmat utaqqilaartariaqartugut. Kingorna paasitinneqarpugut nalullugu qaqugu aallassasugut inuttat ilaat aalakoormat, Najannguaq Olsvig Sandgreen aamma Sissi Lange oqaluttuarput.

Isornartorsiuineq

Disko Linep angallataanik angalanissaat nalunaaqutaq 16.30 kinguartinneqarsimasoq ilisimatinneqarput.

Kommune Qeqertalimmi inunnik isumaginnermik sullissisut Najannguaq Olsvig Sandgreen aamma Sissi Lange assimi takuneqarsinnaapput
Kommune Qeqertalik

- Paasigatsigu aatsaat tallimap qeqqa aallassulluta Diskoline-mut sianerluta aperivugut nerisassarsiutissanik pissanersugut. Uteriitsuusariaqarpoq Diskolinemi kinguaattoornermik nalaataqaraanni. Diskolinemi sulisut pikkoriffiginerusariaqarpaat kinguaattoornerminni aallanngitsoortoqarneranilu ilaasut periarfissaannik nassuiaanissaq. Diskoline-p aalakoortoqarnera pissutigalungu angalanissamik kinguaattoortitsimmat piffissaq eqqorlugu tikissinnaannginnerput qasunarlunilu suliassanik kinguaattoorfiuvoq, oqarput.

Pisoq ajuusaarutigineqarpoq

Disko Linemi pisortap Noëlle Simoudip pisoq ajuusaarutigalugu nalunaarpoq.

- Disko Line-ip angallassinera angallatini inuttaasunit tunaartaqarpoq. Ajoraluartumik suliffeqarfiit allat assigalugit inuttanik napparsimasoornernik eqqugaasarpugut, ilaatigullu aamma imigassaq peqqutaalluni suliartunngittoortoqartarluni. Tamanna Disko Line-imiit ajuusaarutigiinnarsinnaavarput, pisortaq oqarpoq, nangillunilu:

- Erseqqissaassutigissavarpullu, naqissuserlugu, Disko Line-imi imigassartorsimasut allatigulluunniit aanngajaarniutinik allanik atuisut akuersaarneqanngilluinnarmata angalatinneqartaratillu. Uani pisumi suliartunngittoorneq, nalunaaranilu takkutinnginneq pineqarpoq - imigassartorsimalluni suliartortoqanngilaq, Noëlle Simoud allappoq.

Suleriaatsinik allannguineq kinguneqartitsinerlu

Pisup kingorna Disko Line angallatinut inuttat pillugit suleriaatsinik sukateraaq, maannamiit kinguaattoortoqartillugu allannguisoqartilluguluunniit piffissaq siusinnerusoq tamatigut suliffeqarfik nalunaaruteqarsinnaajumalluni.

- Una pisoq pillugu nalunaarutigisinnaavarput kinguneqartitsiumaartoq, kisianni pingaarnertut aamma pitsannguuteqarfiujumaartoq. Disko Line-imut ilaallutik angalasartut tamarmik innersuukkusuppagut kinguaattoortoqartillugu allaffipput attavigisaqqullugu. Sivisuumik utaqqisussat tamarmik nerisaqarnissaat isumagineqartarmat. Taamatuttaaq ippassaq ataasinngornermi allaffimmut attaviginnittut tamarmik ullup qeqqasiortinneqarsimallutik. Ilaasut tamarmik apuuffissaminnut ullormi tassani apuunneqarput, kinguaattuulaaraluarlutik, Noëlle Simoud oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER