Aalakoorluni bussinik aallarussisimasoq innaarsummut aporsimavoq
Ilulissani politiit angut bussimik aallarussisimariarluni ajutoorsimasutut pasineqartoq unnuaq tigusarisimavaat.
Bussi unnuaq Ilulissani innaarsummut aporami aseruissimavoq. Angut aalakoortoq pisumut atatillugu politiinit tigusarineqarsimavoq.
Tamanna Ilulissani unnuaq nalunaaqutaq 01.20-p missaani pisimavoq, kommunip illoqarfimmi bussiisa qaqortut ilaat aallarunneqarsimasoq pillugu Nuummi politiit pigaartui innuttaasumit nalunaarfigineqarsimapput.
Tamanna pillugu Ilulissani politiit kalerrinneqarsimapput, politiillu unnuaq marlup missaani bussi timmisartoqarfiup tungaanut aqqusinermiittoq nassaarisimavaat.
Innaarsummut aporami aseruissimasoq
- Bussi innaarsummut aporami aseruissimavoq. Aallarussisimasoq qimagussimasoq, Ilulissani politiit pisortarigallaraaga Malik Sandgreen oqaluttuarpoq.
Taassuma ilanngullugu oqaluttuaraa, politiit innuttaasut ilaannit bussimik aallarunneqarsimasumik takunnissimasunit ikiorneqarsimasut:
- Qujanartumik inuit ilaat bussimik malinnissimapput. Taakku oqaluttuaraat pasineqartoq qaqqajunnamut qimaalluni aallarsimasoq, Malik Sandgreen oqarpoq.
Aallarussisimasutut imigassartorsimallunilu biilersimasutut unnerluutigineqartoq
Politiit piffissap sivikitsup ingerlanerani angut aalakoortoq nassaarisimavaat tigusaralugulu:
- Taanna aallarussisimasutut imigassartorsimallunilu biilersimasutut kiisalu ingerlatitsisinnaanermut allagartaqarani biilersimasutut unnerluutigineqarpoq. Inatsisitigut allanik unioqqutitsisoqarsimanersoq suli paasiniarparput, Malik Sandgreen sisamanngornermi ullaakkut oqarpoq.
Taassuma ilanngullugu oqaluttuaraa, Munck Gruppeni sulisut, illoqarfimmi timmisartoqarfiliortut, bussip aqquserngup qeqqaniittup peerneqarnissaanut ikiuussimasut.