Aalajangerneq: Kuannersuiarni piiaasoqarnissaanut Naalakkersuisut naaggaarput

Energy Transition Minerals, siornatigut Greenland Minerals A/S-iusimasoq, Kuannersuarni aatsitassanik qaqutigoortunik piiaanissamut qinnuteqarnerminni Naalakkersuisunit itigartinneqarput.

Naalakkersuisut tallimanngornermi 26. maj aalajangerput aatsitassarsiorfik Greenland Minerals A/S ilisimatissallugu Kuannersuarni aatsitassanik qaqutigoortunik piiaanissamut qinnuteqaataannik itigartissallugit.

Itigartitsissut aatsitassanut naalakkersuisoqarfimmit suliffeqarfimmut 1. juni 2023 tunniunneqarpoq.

Naalakkersuisoqarfik tallimanngornermi naatsumik nalunaaruteqarluni taama ilisimatitsivoq. Greenland Minerals Narsap eqqaani Kuannersuarni aatsitassanik qaqutigoortunik, zinkimik uranimillu toraarinnilluni piiaanissamut qinnuteqarsimavoq.

Naalakkersuisoqarfik ilisimatitsivoq aalajangiinerup oqaasertai tamakkiisut kingusinnerusukkut tamanut saqqummiunneqarnissaat naatsorsuutigineqartoq.

Ukiuni 15-ini misissuisut

Energy Transition Minerals, siornatigut Greenland Minerals A/S-iusimasoq Kuannersuarni piiaanissamut qinnuteqarnerup itigartinneqarnissaanut tusarniummut Naalakkersuisunut februarimi akissuteqarput. Akissutit oqaasertai saqqummiunneqarnikuunngillat. Aatsitassarsiorfik akissuteqareertillugu qinnuteqarnerup itigartinneqarnissaanut Naalakkersuisut aalajangernissamik suliaqartussaapput.

Greenland Mineralsip Kuannersuarni misissuinissamut akuersissummik tunineqarneranit ukiut 15-it qaangiussimalerput. Decembarimi Energy Transition Mineralsip misissuinissamut akuersissutertik nutartertippaat, uranimillu piiaanissamut misissuinissamullu inerteqquteqarnermik inatsit piiaanissamut akuersissutiminnut atuutinngitsoq, tamanna takussutissaasoq ingerlatseqatigiiffik isumaqarpoq. Taamalli isummerneq naalakkersuisoqarfimmi pisortap, Jørgen Hammeken-Holmip akerlilerpaa.

Energy Transition Minerals 2021-mili uran pillugu inatsisip allanngortinneqarneranit piiaanissamut akuersissuteqarnissamut ilungersuuteqarsimavoq. Qinnuteqaammut tapiliullugu qinnuteqaraluarpoq piiaanermi uran peerneqartassasoq nunamullu assaanneqaqqittassalluni, taamaasilluni sumiiffimmi aatsitassat allat kisiisa piiartussanngorlugit.

Ukioq ataaseq qaangiutsinnagu naammagittaalliuuteqarsinnaasoq

Naalakkersuisulli maanna itigartitsillutik aalajangermata, aatsitassarsiorfiup aalajangerneq pillugu naammagittaalliuummik suliaqarnissamut ukioq ataaseq periarfissarilerpaat.

Piiaanissamut qinnuteqaatip saniatigut ingerlatseqatigiiffik urani pillugu inatsisip 2021-mi atulersinneqarnera tunuliaqutigalugu isumaqatiginninniartitsinermik aallartitsivoq, tassani ingerlatseqatigiiffiup misissuinissamut akuersissutigeriigaani pisinnaatitaaffii, aamma atuinermut akuersissummik pissarsisinnaanermut piginnaatitaaneq pineqarput.

Powered by Labrador CMS