Aalajangerneq: Kigutit narlorsarniarlugit kigutaarsinneq

Nuummi kigutigissaasut bøjlet atorlugit kigutinik narlorissaaneq 2019-imi unitsittariaqalersimavaat.

Neqeroorummik suliatigut illersorneqarsinnaasumik attassiinnarnissamut sulisunik aalajangersimasunik amigaateqarneq tunngavilersuutaasoq, Inatsisartuni ilaasortamut Sofia Geislerimut paragraf 37 naapertorlugu apeqquteqartumut akissummi allassimavoq.

- Neqeroorut meqqanut inuusuttunullu Nuummiittunut taamaallaat neqeroorutaasimavoq. Tamanna nunami innuttaasunik naleqqutinngitsumik immikkoortitsinertut isigineqarsinnaavoq, Martha Abelsen paragraf 37 naapertorlugu akissummini allappoq.

Pinaveersaartitsilluni kigutinik narlorissaaneq

- Pinaveersaartitsilluni kigutit narlorissarnerisigut kigutit alleqqumi equngasumik naanissaat pinaveersaartinneqarsinnaavoq. Tamanna ilaatigut pisinnaavoq, kigutit piffissami eqqortumi peernerisigut, taamaasillutik akornutinik pilersoqarani kigutit nammineq avissaarniassammata, imaluunniit kigutit sanileriit peernerisigut, kigutit inissaqalerniassammata, allassimavoq.

Kigutilerisoq Jason Nystrup nassuiaavoq, kigutit narlorissarnerannut atatillugu kigutit allat peerneqarnissaat ilaatigut pisariaqalersinnaasartoq.

- Uangali isumaga naapertorlugu tamanna bøjlelerisup kisimi aalajangerlugulu suliarisariaqarpaa, kigutit narlorissarneranni kigutaarsiineq annertummat aarlerinaateqarsinnaallunilu, Jason Nystrup oqarpoq.

Isumaqatiginninniarnerit allerunngulaarnartut

Naalakkersuisut marlunnik siunnersuuteqarsimapput. Nuna tamakkerlugu meeqqat kigutaasa narlorissarlugit bøjlelersuisinnaanermut neqerooruteqarnissamut aningaasat 20 milliuunit koruunit ukiut tamaasa pisariaqartinneqarput. Aningaasalli aningaasanut inatsimmut 2020-moortumut isumaqatiginninniarnermi nassaarineqarsinnaasimanngitsut, tusagassiuutinut ippassaani nalunaarutigineqarpoq.

Behandling af børns skæve tænder stoppes helt

Aningaasaliissutigineqartut 2,3 milliuunit koruunit pinaveersaartitsilluni kigutinik narlorissaanermut atortussanngortinneqarput.

Peqqissutsimut naalakkersuisoq, Martha Abelsen, akissutimini erseqqissaavoq kigutit pillugit nalunaarutip allanngortinneqarnissaa pisariaqanngitsoq.

- Nalunaarut imminermini kigutit narlorissarneqartarnissaannut pisinnaatitaaffimmik imaqanngilaq. Taamaattumik kigutit narlorissarneqartarnissaat pillugu apeqqummut atatillugu nalunaarummik allannguinissamut tunngavissaqanngilaq, Martha Abelsen akissuteqarluni allappoq.

Kigutit narlorissarlugit bøjlelersuisarneq meeqqanut tamanut atulissagaluarpat, kigutilerisut immikkut ilinniarsimasut atorfeqartinneqassapput, ukiumullu ullut 250-it angalanermut sumiiffinnilu najugaqarallarnermut atortassallugit. Aningaasartuutissanut ilaapput inissikkallarnerit, atortut allarpassuillu.