pisortaq nutaaq
Aajuna Royal Arctic Linemi pisortaq nutaaq
Royal Arctic Line A/S-imi siulersuisut 49-nik ukiulik Verner Hammeken suliffeqarfissuarmi pisortaanissatut toqqarpaat
Verner Hammekenip, Narsami inunngortup, A. P. Møller-Mærskimilu shippingimik ilinniagaqarsimasup, Jens Andersen ukiut 14-it Royal Arctic Linemi pisortaareerluni soraarninngortoq aggustip aallaqqaataaniit paarlassavaa.
Taama Royal Arctic Line tusagassiuutinut nalunaaruteqarluni allappoq.
Verner Hammeken maannakkut Mærskip assartuinermut suliffeqarfiutaani Damcomi Nigeriami, Camerounimi aamma nunani taakku eqqaanniittut CEO-tut atorfigisaminit nuussaaq. Taakku saniatigut sumiiffinni aqutsisoqatigiinnut peqataasimavoq Damcomi Indiami, Nunani akullerni aamma Afrikami.
- Qilanaarpunga aallartinnissannut uanga atorfigisassatut kissaatigisatut taasinnaasanni. Ornitassaapput suliassat maannakkut aningasaqarnikkut inissisimanermut tunngasut, umiarsuarnik nutaanik pisaarneq aammattaaq Kalaallit Nunaanni attaveqaasersuinikkut suliniutit annertuut, tamakkununnga ilaalluni Nuummi terminali nutaaq. Tamakku saniatigut annertuumik aamma pissanganartumik suliassaqarpoq Kalaallit Nunaata aamma nunarsuarmi nunat allat akornanni attaveqarnermut tunngasunik, tassani qitiutinneqassapput Kalaallit Nunaannut tamaanngaanniillu assartuinermut akigitinneqartut, Verner Hammeken oqarpoq.
Kinguaariit kigaatsumik paarlaakkiartornerat
Royal Arctic Linemit ilisimatitsissutigineqartut naapertorlugit Verner Hammekenip ilinniakkaminik annertusaasimavoq pikkorissartarnermigut Københavnip Universitetiani, London Business Schoolimi naatsorsuutigalugulu MBA-tut inaarutaasumik soraarummeerutissani juulimi 2015-imi Aston Business Schoolimi naammassissallugu.
- Siulersuitut assut Verner Hammekenip suleqatigilernissaanut isumalluarput. Kigaatsumik kinguaariit paarlaakkiartorneranni umiarsuaatileqatigiiffik ernumanartorsiunngilaq. Maannakkut Verner Hammeken suliassaminut piareersalereersinnaavoq Jensip misilittagai aamma ilisimasaqarnera atorluarlugit. Tamanna siulersuisut tungaannit assut nuannaarutigaarput, siulersuisut siulittaasuat Kuno Fencker oqarpoq.
A. P. Møller-Mærskimi Verner Hammekenip sulinermini suliffigisimavai Danmark, Singapore, Elfenbenskysten, Kina, Den Demokratiske Republik Congo aammattaaq Cameroun, pingaarnertut suliaqarfigisimallugit Mærskimi ingerlatsinerit containerinut tunngassuteqartut.
Verner Hammeken ukiut kingulliit 17-it Danmarki qimallugu sulisimavoq.