Aaja: SAR-imik isumaqatigiissummut aningaasat amerlanerusariaqarput
IA sinnerlugu Folketingimut ilaasortaq SAR-imi upalungaarsimanermut aningaasaliissutit amerlineqarnissaannik piumasaqarpoq. Siumumi Aki-Matilda Høegh-Dam eqqissisimaneruvoq. Air Greenland isumaqatigiinniarnernik ingerlatsivoq, tamannalu tatigaara, oqarpoq.
Kalaallit Nunaannut Ataatsimiititaliamut ilaasortat arlallit tamatumunnga atatillugu illersornissamut ministeri Trine Bramsen suliamut atatillugu sapaatip-akunnerani matumani sisamanngornermi siunersiueqatigiinnissamut aggersarpaat, nutaamik isumaqatigiissuteqartoqalerpat Danmarkimi naalakkersuisut Illersornissaqarfillu upalungaarsimanermut pilersaarutaat politikerinit paasisaqarfigineqarusummata.
Siunersiueqatigiinneq matoqqasuuvoq, taamaammallu politikerit ataatsimiinnermit oqaaseqaqqusaanatik, nunatsinnilli ilaasortat marluusut siunersiueqatigiinnerup kingorna suliamut assigiinngilluinnartunik isumaqarnertik qulaarsinnaavaat.
Qulimiguulik pisoqaasorujussuaq
Aaja Chemnitz Larsen oqaluttuarpoq, Illersornissaqarfiup SAR-imik upalungaarsimanermut aningaasanik amerlanerusunik immikkoortitsinissaa kimigiisissutiginiarini. Illersornissaqarfiup tamanna ukiumut 50 millioner koruunit missaannik ullumikkut atuiffigisaraeerpaa.
Taassuma ullumikkut upalungaarsimanerup ilaatigut qulimiguulimmik pisoqaasorujussuarmik, Air Greenlandip pigisaanik, tunngaveqarnera innersuussutigaa.
- Aningaasanut immikkoortinneqarsimasunut sinaakkutissani qulimiguulik pisoqaasorujussuaq aallaavigineqarpoq. Taamaammat upalungaarsimanermut amerlanerusunik aningaasaliisoqarnissaa pisariaqarpoq, Aaja Chemnitz Larsen oqarpoq.
Tamatuma saniatigut IA annaassiniartartunik taasanik ajornartoortunik annaassiniarnermi ikiuussinnaasunik qulimiguulinni issimasoqartalernissaanik kissaateqarpoq. Tamatuma saniatigut sulisut kalaallisut oqalussinnaasariaqarput, taamalu ajornartoortunik oqaloqatiginnissinnaasariaqarlutik, IA isumaqarpoq.
Air Greenlandimut tatiginninneq
Siumut sinnerlugu Folketingimut ilaasortaq, Aki-Matilda Høegh-Dam, isumaqatigiinniarnernut akuliukkusunngilaq:
- Isumaqarpunga isumaqatigiinniarnerit Air Greenland siuttoralugu ingerlanneqarnerat erseqqissaatigissallugu pingaaruteqartoq, Air Greenlandillu isumaqatigiinniarnerit ingerlannissaannut piginnaasaqarluarnera tatigilluinnarpara, politikerit uanga ilisimasaqarnerunianngikkaluarlunga, Aki-Matilda Høegh-Dam oqarpoq.
- Upalungaarsimanerup sipaarniarfiginiarusunneqarneranik maluginiagaqarsimanngilanga. Taamaattoqarsimagaluarpat qisuariaateqarsimassagaluarpunga, itisiliilluni oqarpoq.
Air Greenland qulimiguulinnik marlunnik 2020-mi tiguneqartussanik 2019-imi inniminniiniarluni aalajangerpoq. Aningaasaliinikkut ilaatigut SAR-imik isumaqatigiissutissaq pillugu neqeroortitsinermut peqataaniarnerup pimoorunneqarnera ersersinniarneqarpoq.
Qulimiguulinnut nutaanut 200 mio. kr. atorsimagaat
Aningaasaqarnermi ingerlatsinikkut sapiiserpaluttumik aalajangerneq, 200 millioner koruunit missaannik aningaasartaqartoq, tamatumali peqatigisaanik SAR pillugu neqeroortitsinermik pimoorussilluinnarumanermik ersersitsisoq.
- Illersornissaqarfiup sunik siunnersuuteqarnissaa takussallugu pissanganassaaq. SAR-imik isumaqatigiissut assigiinngitsorpassuanngorlugu katiterneqarsinnaavoq. Piffissamik isumaqatigiissuteqarfiusumik sapinngisamik sivisunerpaamik soorunami piumasaqarusuppugut, taamaalilluta piffissami sivisunerusumi atortunik aningaasaliissutinillu nalikillilerisinnaaniassagatta, tamanna sunut tamanut akikinnerulersitsisussaammat, Air Greenlandip pisortaanera, Jacob Nitter Sørensen, Sermitsiaq.AG-mut maajimi oqarpoq.