Aaja: Politiit radiukkut atortorissaarutissaasa kinguaattoornerat akuersaarneaqarsinnaanngilaq

Kalaallit Nunaanni Politiit radiukkut atortorissaatimik taarserneqarnissaannut atatillugu naammagittartariaqarput. Suliassaq qaammatit 18-it angullugit kinguaattorutigineqarpoq, Naalagaaffiup politiivi taamatut nalunaaruteqarsimapput.

- Soorunami pakatsinarpoq, politiimmi suliaqaraangamik imminnut attaveqaqatigiinnissaannut taakku pingaarutilipilussuupput, Kalaallit Nunaanni Politiit peqatigiiffianni siulittaasoq Bjørn Bjerregaard oqarpoq.

- Atortorissaarutit innuttaasunut aamma pingaaruteqarput, politiimmi suliaqarnerminni susoqarneranik oqaluttuarsinnaanngimmata, taanna nangilluni oqarpoq.

Politiit radiukkut atortorissaarumminnik taarsiisoqarnissaa ukiuni arlalinni kissaatigisimavaat. Naalagaaffiup politiivi 2019-imi upernaakkut suliariumannittussarsiorput, neqeroortitsinerli ajalusoorsimavoq.

Politikeri ataavartumik aaqqissuteqartoqarnissaanik suliniuteqarniartoq

Naalagaaffiup politiivisa ilisimatitsissutigaat, piffissaliussaq maannakorpiaq qularnartortaqartoq, naatsorsuutigaaalli suliniut qaammatit aqqaneq-marluk 18-illu akornanni kinguaattoorfiussasoq.

Neqeroorutit pissarsiarineqarsimasut suliniummut aningaasatigut killiliussat sinningaatsiarlugit aningaasartallit tiguneqarsimapput.

Taamatut pisoqarsimanera folketingimi ilaasortap Aaja Chemnitz Larsenip (IA) uggoraa:

- Kinguaattoortoqarnera akuersaarneqarsinnaanngilluinnarpoq, sulissutiginiarparalu ataavartumik aaqqiissuteqartoqarnissaata tungaanut aaqqiissutissarsiortoqarnissaa imaluunniit utaqqiisaasumik aaqqiissuteqartoqarnissaa. Isumannaallisaaneq pineqarpoq, aamma politeeq ulorianartorsiulissagaluaruni ikiortissarsiornissamut periarfissaqartariaqarpoq, taamaammat tamanna politikkikkut suliaqarninni uannut pingaaruteqarluinnarpoq, Aaja Chemnitz Larsen oqarpoq.