Aajap sullivinni avatangiisit iliuuseqarfigineqarnerat isornartorsiorpaa

Nunami maani sulinermi avatangiisinut tunngasut quppersagaaraannartigut
isumagineqarsinnaanngillat. Folketingimi ilaasortaq Aaja Chemnitz Larsen (IA) Kalaallit Nunaanni sullivinni avatangiisit iliuuseqarfigineqartarnerat pillugu arlalinnik apeqquteqarnermini akissutisisimasoq taamatut isornartorsiuivoq.

- Kalaallit Nunaanni Sullivinnik Nakkutilliisoqarfik tusarsaanngippallaarsimavoq, pingaarnerpaanulli akuusunik suliaqarpoq, tassami sulinermi avatangiisinut tunngasut ajunngitsutigut ajortutigullu sunniutilerujussuusarput, politikkeri tusagassiorfinnut nalunaaruteqarnermi oqarpoq.

Danmarki susassaqarfimmut akisussaasuuvoq, isornartorsiuinerlu Danmarkimi naalakkersuisunut akisussaaffeqarnerpaasunut tunngatinneqarpoq.

Suliffeqarnermut ministeri Peter Hummelgaard (Soc.) allakkatigut arlalitsigut akissuteqarnernini sullivinni avatangiisit pillugu arlalinnik ilisimatitsissuteqarpoq.

2017-imut ukiumoortumik nalunaarusiaq

Aaja Chemnitz Larsenip ilaatigut apeqqutigisimavaa, Kalaallit Nunaanni sullivinni avatangiisit pillugit ukiumoortumik nalunaarusiaq kingulleq sooq 2017-imeersuunersoq.

Suliffeqarnermut ministerip tassunga akissuteqarnermini oqaatigaa, Sullivinnik Nakkutilliisoqarfiup ilisimatitsissutigisimagaa, nakkutilliisoqarfiup ukiumoortumik nalunaarusiai nutserneqarumaartut piaartumillu nittartakkamut ikkunneqarumaartut.

- Sullivinnik Nakkutilliisoqarfik suliffeqarfinni avatangiisinik nukittorsaaniarluni quppersagaaraliorsimavoq, taakku Kalaallit Nunaanni suliffeqarfinnut ingerlaavartumik nassiussuunneqartarput, akissuteqaammi allassimavoq.

Apeqqut alla aqqutigalugu paaserusunneqarsimavoq, Sullivinnik Nakkutilliisoqarfiup kingullertigut periusissiaata 2018-imi atorunnaartup taartissaa qaqagukkut pissarsiarineqarniarnersoq. Ministerip akissuteqarnermini ilisimatitsissutigaa, periusissiaq nutaaq 2022-mi saqqummiunneqassasoq naatsorsuutigineqartoq.

- Quppersagaaraannartigut isumagineqarsinnaanngitsut

Aaja Chemnitz Larsenilli akissutigineqartut naammaginngilai:

- Naalakkersuisut namminneq oqarnerattut Sullivinnik Nakkutilliisoqarfimmit nakkutilliinertigut, toraagalimmik iluarsiisarnertigut paasissutissiisarnertigullu sulinermi avatangiisit isumannaatsut, peqqissut ineriartortitsiviusullu peqataaffigineqartussaapput. Tamannali ullumikkut taamatut isikkoqanngilluinnarpoq.

- Sulinermi avatangiisinut tunngasut quppersagaaraannartigut isumagineqarsinnaanngillat, pingaartumik sullivinni alloriaatissat nakkutilliinernik malitseqartinngikkaanni
paasissutissatuallu pigineqartut pisoqalisimappata, politikkeri oqarpoq.

Sermitsiaq.AG-mit suliffeqarnermut ministeri Peter Hummelgaard isornartorsiummut oqaaseqartinniarneqarpoq.