Skip to main content

Aajap statsministerimit ersarissunik akissutisinissani naatsorsuutigaa

Danskit ministeriunerat, Lars Løkke Rasmussen (V) ilaasortanit atlantikup avannaaneersunit siullermeertumik apeqqarissaarfigineqassaaq. Inuit Ataqatigiit ilaasortaatitaat Aaja Chemnitz Larsen apeqqarissaarnermi siulliulluni aperisuussaaq apeqqutissanilu piareeqqallugit

Danskit statsministeriat, Lars Løkke Rasmussen (V), ilaasortanit atlantikup avannaaneersunit siullermeertumik apeqqarissaarfigineqassaaq.

Tamanna ullumikkut marlunngornermi Folketingimi pissaaq.

Inuit Ataqatigiit folketingimut ilaasortaatitaata Aaja Chemnitz Larsenip, ersarissunik akissutisinissani pitsaasumillu oqaloqateqarnissani naatsorsuutigaa.

Atuaruk: Danmarkimi ilinniartut taamaatiinnartarnerat IA-p akiorniarpaa

Aningaasanut inatsit aamma naalagaaffeqatigiinneq
Aaja Chemnitz Larsen ilaatigut aningaasanut inatsit aqagu sisamanngorpallu taasissutigineqartussaq pillugu apeqqutissaqarpoq. Aamma naalagaaffeqatigiinni uagutsinni siuariartortitsinissamut inuussutissarsiornikkullu inerisaanissamut tunngasunik Statsiministeri qanoq eqqarsaateqarnersoq aperissavaa. 

- Tamannarpiarmi naalakkersuinikkut tunngavigisami ersippianngilaq, naak Venstre partiiugaluartoq liberaliusoq naalakkersuisullu tunngavigisaanni Kalaallit Nunaannut/Naalagaaffeqatigiinnermut tunngasut naalakkersuisut siunertatik allaqqissaarsimagaluaraat.

- Kalaallit Nunaanni suliffissanik nutaanik pilersitsisoqassappat siuariartortitsisoqassappallu Kalaallit Nunaata Danmarkillu suleqatigiiffigisaannik inuussutissarsiornikkut nukittorsaanissaq aningaasaliisinnaasunillu qarmaanissat pisariaqarput, Aaja Chemnitz Larsen tusagassiorfinnut nalunaarummi oqarpoq.

Atuaruk: Danmarki Nunarpullu ilinniartitaanermi ilisimatusarnermilu suleqatigiissapput

Puisip amia
Apeqqarissaarnermittaaq EU-mi puisit amiinik tunisisinnaanerup ammaanneqarnissaanut nungusaataanngitsumik puisinniarnermit ammit pillugit EU-mi paasisitsiniaasoqarnissaanik ataatsimoorussamik uteriisertoqarnissaanut tunngatillugu Statsministeri aperineqassaaq.

2009-mili EU-mi inerteqqutigineqalermata isertitassaagaluit 350 millionit koruunit annaaneqarsimasutut nalilerneqarput. Kiisalu EU-mut tunngasutigut Kalaallit Nunaata peqataatinneqarnissaanut tunngasut apeqqutigineqassapput.

Danskit inatsisiliaasa 50-80 procentii EU-miit aalajangerneqartartut nalilerneqarpoq, tassanilu pisani Kalaallit Nunaannut tunngasuni danskillu oqartussaaffigisaanni toqqaannartumik toqqaannanngitsumillu EU-mi inatsisiniit sunniuteqarfigineqartartut arlaliupput.

Apeqqarissaarfik atlantikup ilaasortaanit peqataaffigineqarsinnaasoq kvartalikkaartumik ataasiarluni pisarpoq. Periarfissaq tamanna qinigaaffimmi kingullermi ammaanneqarpoq.

Atuaruk: Aaja: Illersornissamut tunngatillugu nutaamik isumalioqqinnissaq pisariaqartoq

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER