Aajap oqariartuutai IA-p isumaqatiginngilai

Inuit Ataqatigiit politikkianniinngilaq nunaqarfinnik matooriniarneq, taamaammat Aaja Chemnitz Larsenip oqariartuutiminik kisimiilluni akisussaavoq, Múte B. Egede oqarpoq.

Inuit Ataqatigiit sinnerlugit Folketingimi ilaasortap Aaja Chemnitz Larsenip tunuliaquttaminit tapersersorneqarnissani naatsorsuutigisinnaanngilaa oqaruni nunatsinni atugarissaarneq annertusiniarlugu nunaqarfiit ilaannik matusisoqartariaqartoq.

Partiip siulittaasuata, nunaqarfinnik matusinissamik oqalunneq isumaqatiginngilaa:

- Folketingimi ilaasortaatitatta oqaatigisai inuttaata akisussaaffigai. Manna aqqutigalugu naqissusissavara Inuit Ataqatigiit partiitut siunertarinngisaannarmagu siunertarinngissaannassallugulu inoqarfinnik matooraanissaq. Inuit kikkulluunniit kiffaanngissuseqarput sumiluunniit najugaqarnissaminnut namminneq aalajangiinissaminnut. Tamanna qaqugumulluunniit apeqquserneqassanngilaq, Múte B. Egede tusagassiorfinnut nalunaaruteqarluni oqarpoq.

Aaja Chemnitz Larsen Folketingip ammarneqarneranut atatillugu oqalugiaatip oqaluuserineqarnerani nunaqarfiit ilaat matutinneqarsinnaanerat oqaatigaa, nunap iluani atugarissaarnerup pitsaanerulernissaa anguniarlugu.

Aaja Chemnitz Larsenili taama isumaqaruni kisimiippoq, partiimi ineriartorneq peqqissoq anguniarlugu suliniuteqartitserusunneruvoq.

- Inuit Ataqatigiinniit aamma erseqqissaatigissavarput pissutsit piviusut tassaammata inoqarfinni tamani, annerusumik minnerusumilluunniit, ajornartorsiuteqaratta ammasumik matoorinatalu oqaluuserisariaqakkatsinnik iliuuseqarfigisariaqakkatsinnik, qinikkatut inuiaqatigiittullu akisussaaffitsinnik, inuiaqatigiit siunissami peqqissumik toqqammaveqarlutik ingerlanissaat ineriartortuarnissaallu Múte B. Egede oqarpoq.

Nunaqarfinnit isornartorsiorneqartoq

Nunatsinni nunaqarfiit peqatigiiffiat, Kanunupep siulittaasuata Jens Kristian Therkelsenip folketingimi ilaasortap taama nalunaaruteqarnera sakkortuumik isornartorsiorpaa.

- Tupinnarpoq qinigaq nuimasoq naalagaaffeqatigiit oqaluttarfiisa pinagarnersaannit taamatut oqaaseqarsinnaammat. Qularnanngilarmi matooraasoqassappat tamanna annertuumik kinguneqarnerlorujussuartussaammat, Kanunupemi siulittaasoq Jens Kristian Therkelsen (S) oqarpoq.

Taassuma erseqqissarpaa G-60-ip nalaani nunaqarfinnik matooraasimaneq suli kingulersuuteqartoq.

- G-60-ip politikkia kingunerluuteqaqisoq nunatsinni atoqqinnianngilarput. Eqqissilluta nunaqarfinni najugaqarusuppugut. Nukiit politikkikkut iluarsisassasanut allanut atorneqarniarlik, Kanunupep siulittaasua kaammattuivoq.

Powered by Labrador CMS