Aajap nunanit allamiut inuiaqatigiinnullu ilanngutivitsitsisarneq sammigai
Nunanut allamiunut inatsit Nunatsinni atuuttoq ukiunik 20-nik pisoqaassuseqarpoq, Danmarkimili piffissap pineqartup ingerlanerani 150-eriarluni inatsit sukaterneqartarsimavoq. Sukaterisarnerup iluaqutissartai ajoqutissartaalu suuppat, IA-meersoq Aaja Chemnitz Larsen aperivoq.
Aaja Chemnitz Larsen Danmarkimi udlændinge- og integrationsministerimut Mattias Tesfayemut marlunnik apeqquteqarsimavoq, nunanut allamiunut inatsimmut kiisalu nunanit allaneersut inuiaqatigiinnut ilanngutivinneqartarnerannut atatillugit.
IA sinnerlugu folketingimi ilaasortap Aaja Chemnitz Larsenip paaserusuppaa, nunanut allamiunut inatsisip ukiuni kingullerni 20-ni Danmarkimi 150-eriarluni sukateriffigineqarsimasup, Kalaallit Nunaanni nutarterneqartarsimannginnerata iluaqutissartai ajoqutissartaalu suunersut.
- Tamatuma malitsigisaanik Kalaallit Nunaanni nunanut allamiunut inatsit ullumikkut killilersugaanngilaq, Danmarkimili nutarterneqartuarluni. Ministerip Kalaallit Nunaanni nunanut allamiunut inatsisip iluarsiiffigineqarnerani iluaqutissartat ajoqutissartallu Naalakkersuisunut oqaloqatigiissutigerusuppai, Aaja Chemnitz Larsen aperivoq.
Inuiaqatigiinnummi ilanngutivitsitsisarneq?
IA sinnerlugu folketingimi ilaasortap ilanngullugu paasisaqarfigerusuppaa, inuaqatigiinnut ilanngutivitsitsisarneq pillugu Danmarkimi naalakkersuisut Naalakkersuisullu oqaloqatigiittarnersut.
- Kalaallit Nunaanni nunanit allaneersut inuiaqartigiinnut ilanngutivinneqarnissaat Kalaallit Nunaata akisussaaffigivaa, tassa ineqarnermut, ilinniartitaanermut isumaginninnermullu oqartussaaffiit angerlaanneqareernikuummata. Taamaammt Kalaallit Nunaanni ilanngutivitsitsinissamut inatsiseqannginneq unammillernartuuvoq, susassaqarfimmi iluarsiiffigineqarsimanngilaq, aamma Kalaallit Nunaat 2017-imi qimaasumik siullermeerluni tikisitsivoq. Kalaallit Nunaanni inuiaqatigiinnut ilanngutitsivinnissap pillugu inatsisiliortoqarnissaa pillugu ministeri Naalakkersuisunik 2017-imili oqaloqateqartarsimava, nunanummi illanut inuiaqatigiinnullu ilanngutitsivittarneq pillugit oqartussaaffiit imminnut attuumassuteqarmata, Mattias Tesfayemut apeqqut taamatut nipeqarpoq.