Aajap danskit isumaqatigiissutaat milliardinik nalilik illersoraa
Danskit issittumi piginnaasanik annertusaanissamut 1,5 milliarder koruuninik immikkoortitsisimanerat Kalaallit Nunaanni ajornartorsiutit ilaannut aaqqiissutaasussaavoq inuiaqatigiinnullu iluaqutaasussaalluni, Naalakkersuisut isumaqatigiissummut akerliullutik oqaaseqareersut folketingimi ilaasortaq oqarpoq.
Folketingimi Issittup illersorneqarneranik pitsanngorsaanissaq isumaqatigiissutigineqarmat, issittumi piginnaasanik annertusaasoqarnissaanik Naalakkersuisut soqutiginninnatik nalunaaruteqaraluartut, folketingimi ilaasortap Aaja Chemnitz Larsenip isumaqatigiissummi suliniutigineqarniartut Kalaallit Nunaannut iluaqutaasussaasut suli isumaqarfigai.
Isumaqatigiissummut ilaatigut ilaavoq, droninut Kalaallit Nunaata imartaatalu nakkutigineqartarnerannik pitsanngorsaasussanut danskit 750 millioner koruuninik aningaasaliissuteqarsimanerat.
OIA-milu politikkeri naapertorlugu taamatut iliuuseqartoqarnissaa pisariaqarluinnarpoq:
- Nakkutilliisoqarnerunissaanik ukkataqartoqarnissaa pisariaqarpoq. 2016-imi Issittoq pillugu misissuisoqarsimanerata takutippaa tamanna pisariaqartinneqartoq, pisariaqartitsinerlu ukiut ingerlaneranni annertusiartuinnavissimavoq.
'Russit aqqartartui Kinamiullu umiarsuaataat sorsuutit'
- Russit aqqartartui Kinamiullu umiarsuaataat sorsuutit Kalaallit Nunaata imartaaneereerput, Nunatsinni susoqarnersoq ilisimasaqarfiginerusariaqarparput, Aaja Chemnitz Larsen Sermitsiaq.AG-mut oqarpoq.
Taassuma aamma pingaaruteqarnerarpaa, Kalaallit Nunaanni pitsaanerusumik nakkutilliisoqarneratigut Illersornissaqarfiup assersuutigalugu ujaasillunilu annaassiniartarnerata pitsanngorsaavigineqarnissaa siunertarineqartoq, taamalu sakkutuut inuinnaallu nakkutilliinerulersinnaanngussallutik.
AAMMA ATUARUK: Siumut Pele-p nalunaarutaa pillugu: Tupinnaqaaq
Issittumi piginnaasanik annertusaanissamut isumaqatigiissummi pingaaruteqartut ilagaat, Kangerlussuarmi illersornissamut ilinniarfiliortoqarniarnera. Tamanna aamma isumassarsialatsiaasoq, politikkeri oqarpoq:
- Nalinginnaasumik sakkutuunngorniartoqassanersoq imaluunniit upalungaarsimasutut ilinniartitsinerussanersoq oqallissigiuarsinnaavarput, namminerli nunatsinni Issittumi Sakkutooqarfiup suliarisartagaanut kalaallit amerlanerit peqataatinneqanngippata isumaqatigiissut iluaqutaanavianngilaq. Issittumi Sakkutooqarfik inuinnarnut ikiuulluni pingaarutilinnik suliarpassuaqartarpoq, soorlu ujaasillunilu annaassiniartarluni. Illersornissamut ilinniarfissaq eqqarsaatigalugu, soorunami kommunit Naalakkersuisullu peqataatinneqarnissaat pingaaruteqarpoq.
Nammineq partiiminut akerliusoq
- Nunatsinni ilinniarfissatut periarfissaavoq nutaaq. Kalaallit amerlanerit Illersornissaqarfimmi ilinniagaqarnissaannik qulakkeerinninnissaq siunertaqarluarpoq, taakkumi oqaatsit nunalu ilisimasaqarfigilluarpaat, inuusuttullu taamaalillutik ilinniarfissaqalissallutik. Politiit tamanna misilittagaqarfigilluarpaat, Aaja Chemnitz Larsen oqarpoq.
Folketingimi ilaasortaq taamaalilluni Nunanut allanut Naalakkersuisup Pele Brobergip (N) nalunaarutaanut, taamalu nammineq partiiminut, Naalakkersuisooqatigiinni amerlanerussuteqartunut akerliulluni nalunaaruteqarpoq.
Pele Brobergip TV2-mut erseqqissaatigisimavaa, Naalakkersuisut Kalaallit unaanni droneqartitsiniarnermut imaluunniit illersornissamut ilinniarfeqalersitsiniarnermut soqutiginninngitsut.
Allatut aningaasaliinissamik saqqummiussisariaqartut
Naalakkersuisut nalunaarutaannut qanoq isumaqarpit?
- Oqaatigiinnarpara suliassaq nakkutilliisarnermut illersornissamullu ilinniartitsinermut aaqqiissutaasinnaasoq isumagineqartariaqartoq. Taamaattoqanngippammi ullumikkut unammilligassatut atukkatsinnut allatut aningaasaliissuteqarsinnaaneq oqaatigineqartariaqarpoq. Tamannami ullumikkut isumannaarneqarsimanngilaq.
Pele Brobergip TV2-mut tusagassiorfinnullu allanut oqaatigisimavaa, naalakkersuisooqatigiinnissamik isumaqatigiissummi erseqqissumik allassimasoq, Kalaallit Nunaat sakkulersorfiussanngitsoq. Naalakkersuisut aamma Islandimi aaqqissuussatut ittumik atuisoqarnissaa kissaatigaat, tassa Kalaallit Nunaanni taamaallaat sineriammi nakkutilliisoqartassasoq.
Aaja Chemnitz Larsenilli tamanna piviusorsiortuunnginnerarpaa:
- Sineriammi nakkutilliisartunik taamaallaat pilersitsisoqarnissaa naatsorsuutigineqarpat oqaatigisariaqarpara, pissutsit tamakku qaangiutereernikuusut. Nunatsinni arlaannik susoqartarpoq nakkutigisariaqakkatsinnik eqqumaffiginerusariaqakkatsinnillu.