Aajap akiuussutissamut akiligassaq paasisaqarfigerusukkaa
Danmarkip naalagaaffiata Covid-19-imut akiuussutissaq akilerpaa. Akiuussutissanulli akiliuteqartarneq ingerlatiinnarneqarniarpa, Aaja Chemnitz Larsen peqqissutsimut ministerimut Magnus Heunickemut paasisaqarusulluni aperivoq.
Nunatsinni Nakorsaanerup Henrik L. Hansenip siusinnerusukkut ilisimatitsissutiginikuuaa, Covid-19-imut akiuussutissamut, Nunatsinni innuttaasunut piffissami matumani tunniunneqartartumut akiligassaq Danmarkimit akilerneqarniartoq. Qularutissaanngilarli innuttaasut kingusinnerusukkut akiuussutissalerteqqinneqarnissaat, soorlu nualluummut ukiumut ataasiarluni akiuussutissaliisoqartartoq.
IA sinnerlugu folketingimi ilaasortap Aaja Chemnitz Larsenip peqqissutsimut ministerimut Magnus Heunichemut apeqqutigisimavaa, ” Nunatta peqqissutsimut tunngassuteqartut amerlanersaat nammineq isumagisalereerai, Nunarput akiliisinnagu Danmarkip akiliuteqarneranut suna pissutaanersoq”.
Qanoq akeqarpa?
- Susassaqarfik suli angerlaanneqanngitsoq pineqarpa, taamaanngippallu sooq Naalakkersuisut akiuussutissanut namminneq akiliuteqarniarlutik neqerooruteqarsimanngillat? Nunatsinni akiuussutissalersuinerit Danmarkip naalagaaffianut qanoq akeqarsimappat, IA-mi politikkeri aperivoq.
Aaja Chemnitz Larsenip Sermitsiaq.AG-mut oqaatigaa, Danmarkip akiuussutissanut akiuliuteqarnera ajoriffissaqarinnagu, ”tamannali tupigusuutigaara, nalinginnaasumimmi nammineerluta akiliuteqartaratta”.
Paasisaqarnerorusuttoq
- Danmarki maannakkut akiliuteqarmat, taava siunissami nunatsinni akiuussutissalersuinissat aamma akilerniarpaat. Tamanna paasisaqarfigissallugu inissaminiippoq, Aaja Chemnitz Larsen oqarpoq.
Ritzau decembarip qaammataani EU-p paasissutissaatai malillugit ilisimatitsivoq, Pfizer aamma BioNTechimeersoq akiuussutissaq ataaseq 115 koruunit missaannik akeqartoq. Marloriarluni akiuussutissalertinnissaq piumasaqaataammat, innuttaasumut ataatsimut akiligassaq taamaalilluni 230 koruunit missaannik akeqassaaq.
Nunatsinni innuttaasunut tamarmiusunut taamaalilluni akiuussutissamut akisuumut akiligassaq en million koruunit missaanniissaaq, tassa apeqqutaalluni akiuussutissalertinnissamut qanoq ukioqarnissaq killissarititaanersoq.