Aaja: Ministeri Naalakkersuisullu sulianik uninngatitsiinnarput

IA-p folketingimut ilaasortaatitaata allakkani ammasuni, assartuinermut ministeri Naalakkersuisullu sulianik uninngatitsiinnartutut taavai.

- Angallannerup iluani uninngaannartorpassuaqalernera tulluartuunngilaq. Piffissami sivisuallaalertumi pimoorussinani suliniuteqarnerup suleqatigiissitallu naalagaaffiup Naalakkersuisullu sinniisoqartitaannit sulianik uninngatitsiinnarnerup kingunerisaanik suliat arriippallaarput suliniutillu naammaginaratik. Inuiaqatigiinnut arlalinnik pitsaanngitunik kinguneqarpoq, Aaja Chemnitz Larsen isornartorsiuivoq.

Uninngatitsiinnarneq

IA tunuliaqutaralugu politikerip suliat uku taajorpai:

• Kalaallit Nunaanni qamutinik motoorilinnik nakkutilliineq – Kalaallit biilii ukiuni 20-ni nakkutilliivigineqarsimanngillat, taamatullu aqqusinerni angallannermi sillimaniarneq nakkutilliivigineqarani. Angallannermut ministeri 2005-imili Naalakkersuisunut isumaqatiginninniarluni aallartippoq, kalaallit qamutai motoorillit piffissami aalajangersimasuni nakkutilliivigineqartarnissai pillugit – suliaq suli naammassineqanngilaq.
• Qamutit motoorillit annertussusaannut nalunaarutip nutarternissaa – Qamutit motoorillit nalunaarummi 1979-imeersumi uuttuutigineqartunit annerusut, atorsinnaanersut politiinit nalilersorneqaqqaartarput, taamaammat inatsimmi ammasuunissaq naammaginarani.
• Angallannermi inatsisip nutarsarnissaa, kalaallinut tulluarsarlugu – Angallannermut inatsi nutarsarneqartuarpoq, Kalaallit Nunaannili atukkanut tulluussarnissaanut suli amigaateqarluni. Assersuutigalugu ATV-t UTV-llu traktooritut immikkoortinneqarsimapput.
• Ukiuutillugu taartarnerani silaannakkut angallassinissamik pitsaanerusumik qulakkeerinissaq – Angallannermut aqutsisoqarfik 2017-imi nutaamik immikkut akuersissuteqarmat ukiuunerani taartarnerani angallanneq VFR-imi maleruagassat malillugit killeqarnerulerpoq. Sungiusarnerit atortullu ullumikkumut naleqqunnerusut eqqunneqassapput, Avannaani angalasut atugaat ajorneruleqqunagit.
• Biilernermut allagartat nunap killii qaangerlugit atorneqarsinnaanerannut pitsanngorsaasoqassaaq – EU-p inatsisaasa kinguneranik biilersinnaasut naalagaaffeqatigiit iluanni nunamut allamut nuunnerminni biilersinnaanermut periarfissalunnerulersarput. Innuttaasut arlallit, pingaartumik suliffeqarnerup iluani, tamassuminnga aporfeqartarput.

Saaffiginnittut amerlanerpaat

- Assartuineq pillugu uannut saaffiginnittorpassuusarput. Naalagaaffik Naalakkersuisullu pissutsinik aaqqiisoqarnissaanik ujartuillunga aperigaagakkit aamma anngaasaraluarput, pisoqaqqinngisaannarporli. Suli suliassaqangaatsiarpoq. Innuttaasunut inuussutissarsiuteqartunullu atugassarisaasut ajuusaarnarput, Aaja Chemnitz Larsen ilisimatitsivoq uninngatiinnarneqartut suliarineqartariaqartut, Kalaallit Nunaanni angallannikkut sillimaniarnermut toqqissisimanissamullu tunngassuteqarluinnarmata.