Skip to main content

Aaja: Meeqqat illoqartinneqarnissaat pisariaqartinneqarluarpoq

Meeqqat illui meeqqanik innarlerneqarsimasunik pitsaanerusumik katsorsaanissaq qulakkeerlugulu uppernarsaataasinnaasunik qulakkeerinneqataassapput, taamatut isumaqarpoq folketingimi politikkeri.

Meeraq innarlerneqarsimasoq meeqqat illuanni ikiorserneqarsinnaassaaq.

Meeqqat illuanni oqartussat tamarmik sulisoqassapput, meeqqap taamaalilluni politiit sumiiffimmi allami, isumaginnittoqarfik sumiiffimmi allami peqqinnissaqarfillu allami naapittariaqassanngilai.

Inuit Ataqatigiit sinnerullugi folketingimi ilaasortaq Aaja Chemnitz Larsen isumaqarpoq, Folketingi suliniummut aningaasaliissuteqartariaqartoq.

Suliniummi tunngavigineqarsinnaavoq, Islandimi ataasiinnarmik saaffissaqartitsilluni periuserineqartoq:

- Tassa meeraq ilaqutaalu ataasiinnarmut saaffiginnittassapput, tassani politiineersut eqqartuussivinneersullu, danskit Kalaallit Nunaanni akisussaaffianneersut, peqqinnissaqarfimmeersut isumaginnittoqarfimmeersullu kalaallinit oqartussaaffigineqartut, meeqqat ilaqutariillu pineqartut ikiorsertassavaat, Aaja Chemnitz Larsen Danmarkimi aningaasanut inatsisissaq sisamanngormat siullermeerlugu suliarineqarmat taamatut oqarpoq.

Innarliisoqarsimanerani uppernarsaatinik qulakkeerinnissinnaasoq

Aaja Chemnitz Larsenip aamma oqaatigaa, meeqqat illui innarliisoqarsimatillugu uppernarsaatinik qulakkeerinneqataasinnaasut:

- Suliarpassuit kinguaassiuutitigut innarliisoqarsimaneranut uppernarsaatissaqannginneq pissutigalugu itigartitsissutigineqartartut takusarparput, isumaqarpugullu meeqqat illui suliani pineqartuni uppernarsaatinik pissarsiniarnermi nukittorsaaqataasinnaasut.

- Meeqqat ullumikkut suliiffinni assigiinngitsuni videokkut apersorneqartarnerannut sanilliullugu meeqqat illui toqqissisimasumik atugassaqartitseqataasinnaapput, aamma meeqqap - sumiiffimmi ataatsimi - katsorsarneqarnissaanut qulakkeerinneqataasinnaapput, Aaja Chemnitz Larsen oqarpoq.

Nittarsaassinermut aningaasaliissuteqarnissaq

Aaja Chemnitz Larsenip meeqqat illuinut tunngatillugit oqaaseqarnermi saniatigut oqaatigaa, Nummi Ilulissanilu timmisartoqarfissat suliarineqarneri naammassineqarpata Kalaallit Nunaata takornariarfissatut nittarsaanneqarneranut Danmarki peqataasariaqartoq. 

- Visit Greenland nittarsaassilluni suliaqartussaavoq, Kalaallillu Nunaata tassunga atatillugu akisussaaffeqarnera qularutigineqanngilaq, isumaqarpugulli tamanna suleqatigiissutigineqarsinnaasoq, aamma Folketingi pisariaqartinneqartumik nittarsaasseqataasinnaasoq, Aaja Chemnitz Larsen oqarpoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER