Aaja: Kinguaassiuutitigut innimiilliorfigineqartarneq politiinit pimoorunneqartartoq uanga misigisarpara

IA-mi politikkerip sexolog Ulrikka Holm kinguaassiuutitigut innimiilliorfigineqartarnermik innarliisarnermillu oqaluuserisassanngortitsimmat nersualaarpaa. Aaja Chemnitz Larsen nammineerluni messengerikkut kinguaassiuutitigut arlaleriarluni innimiilliorfigineqartarsimavoq.

Sexologip Ulrikka Holmip AG kingullermik saqqummersoq aqqutigalugu politiit isornartorsiorpai, kinguaassiuutitigut innmiilliorfigineqartarnerminik nalunaaruteqartarnera pimoorullugu tiguneq ajormassuk.

Ulrikkap marloriarluni innimiilliorfigitissimanini oqluttuarai, misigisarsimavoq politiinit ikiorserneqarani. Siullermik angutip uppataatigut attuualaartarsimavaa. Aappaattut angut alla arlaleriarluni sianertarsimavoq tissassaatigaluni.

- Ulrikkap tamatumannga oqallissaarinera ajunngilluinnartutut isigaara. Taamatut killissamik qaangiilluni iliortoqartarnera oqaluuserisariaqarparput. Inuiaqatigiit ilutsinni ajortunik pisoqartarpoq kipitittariaqakkatsinnik, IA sinnerlugu folketingimi ilaasoraq Aaj Chemnitz Larsen Sermitsiaq.AG-mut oqarpoq.

Nammineq kanngutsaattuliorfigineqartartoq

Aaja oqaluttuarpoq, politikkeritut sulinermini arlaleriarluni messenger aqqutigalugu Ulrikka Holmip oqaluttuarisaata assiganik misigisaqartarsimalluni. Aarlaleriarluni aamma video taamaaliortoqarnerani atorneqartarsimavoq.

- Oqallinneq allanngortilaarusuppara, nammineerlungami misigisarsimavara, taamatut kanngutsaattuliorfigineqaraangama nalunaarutigigaangakku, politiinit tamatigut pimoorullugu tiguneqartarnera, Aaja oqaluttuarpoq.

- Angut messenger aqqutigalugu uannut attaveqarsimasoq politiit killisioreerlugu ippassaq attaveqarfigivaannga. Uppernarsaatinik allanik piumaffigivaannga, tassa angut pinngitsuunerarsimammat, taamalu suliaq akerleriissutaalersinnaammat.

Sulisut amerlineqarnissaat sulissutiginiaraa

Politiinit maannakkorpiaq sulissutigineqarpoq, meeqqat kinguaassiuutitigut atornerlunneqarsimasut pillugit nalunaaruteqartoqarnissaa. Tassungarpiarlu atatillugu Ulrikka Holm inersimasut kinguaassiuutitigut innarlerneqartarnerat pillugu oqallissaaruteqarpoq.

- Politiit meeqqanik innarliisarneq pillugu sulianik manna salliutitsisalernerat eqqortumik iliornerusoq isumaqarpunga, taamatummi iliornerit pinerliinerit ajornersat ilagimmassuk.

- Politiilli inersimasut kinguaassiuutitigut innarlerneqartarnerat pillugu suliassat isumaginissaannut sulisunik amerlanerusunik pisariaqartitsippata, piareersimavunga tamatuma sulissutiginissaanut.

- Inatsisinik atuutsitsinermut tunngasutigut maanna isumaqatiginninniarnermut atatillugu najukkani politiit amerlineqarnissaat kissaatigisimavarput, Aaja Chemnitz Larsen (IA) oqarpoq.

Ulrikka Holmip apersorneqarnera tamaat AG-mi kingullermik saqqummersumi atuarsinnaavat:

Powered by Labrador CMS