Aaja: Hammondip ilaasortaanini sumiginnarpaa
Qineqqusaarneq aallartilluareerpoq, IA-llu Folketingimut ilaasortaatitaa Aaja Chemnitz Larsen maanna suleqatiminut Aleqa Hammondimut sakkortuumik isornartorsiuiovoq, taanna "Kalaallit Nunaat pillugu oqallinnerni pingaaruteqartuni Folketingimi pilersitsinissanut piginnaatitaanini sumiginnarsimavaa" taama oqaatigineqarpoq.
Aaja Chemnitz Larsenip Aleqa Hammond “angusat allattorsimaffiannik” saqqummiusseqquaa, tassani partiip Folketingimi qinigaaffimmi kingullermi angusat erseqqissarneqarnissaat kajumissaarutigaa.
- Tamannarpiaq, tassa Kalaallit Nunaannut tunngasutigut Folketingimi ataatsimiittoqartillugu Aleqap ersarinneq ajornera peqataasannginneralu uanga uggorivara. Tamanna Kalaallit Nunaannut uggornartuuvoq. Taamaattumillu ima apererusuppunga: Naak naammassisatit? Aleqa Kalaallit Nunaannut iluaqutissatut suliaminik saqqummiinermigut folketingimi sulinerminik ersarissaanissaanik kajumissaarpara. Uannit isigalugu Aleqa Hammondip sulissutigisimasai naammassinissaannullu malittarisimasai annikitsuararsuupput, Aaja Chemnitz Larsen tusagassiuutinut nalunaarummi oqarpoq.
IA-mi politikerip tusarniaanernut arfinilinnut aamma isumasioqatigiisitsinernut tallimanut suliniuteqarsimanini naatsorsorsimavaa. Aaja Chemnitz Larsenip oqarnera naapertorlugu Aleqa Hammond tusarniaanermut imaluunniit isumasioqatigiisitsinermut ataatsinnguamilluunniit suliniuteqarsimanngilaq.
- Kalaallit folketingimi ilaasortaatitaasa tamarmik Kalaallit Nunaata ersarinnerunissaanut naligiimmik ilungersuutiginninnissaat nunarput sinnerlugu kissaatiginarpoq. Qinigaaffimmi matumani tamanna pisimanngilaq, Aleqa Hammonimmi oqallinnerni pingaaruteqartuni nunarpullu pillugu Folketingimi pilersitsinissanut piginnaatitaanini sumiginnarsimavaa, Aaja Chemnitz Larsen oqarpoq.