Skip to main content

Aaja: Akisussaassuseqanngitsumik aalisarnermi politikkeqarneq unitsilli

Aalisarpallaarnerujussuaq annikillisinniarlugu umiatsiaararsortut akuersissutaatillit ikilisinneqartariaqarput. Folketingimi ilaasortaq Aaja Chemnitz Larsen (IA) taama isumaqarpoq.

Aaja Chemnitz Larsenip (IA) aalisarnermut naalakkersuisup Jens Immanuelsenip (S) aalisartunut nutaanut akuersissutit killilersorneqalernissaannik oqariartornera naammagisinnaanngilaa. Aaja Chemnitz Larsen isumaqarpoq killilersuilernissaq alloriarneq pitsaasuusoq, nunatsinnili aalisarnermi alloriarneq annertunerusoq pisariaqartinneqarpoq, aalisarneq ingerlanneqartuaannassappat. Kalaallit Nunaata avammut nioqqutaasa 93 procentii aalisarnerminngaanneerput.

LÆS OGSÅ: Jens Immanuelsen: Killeqanngitsumik aalisarneq atorunnaassaaq

- Kalaallit Nunaanni aalisarneq ajalusoorluinnassappat tamanna nunap aningaasaqarneranut tungiuinermullu kingunerluuteqartitsingaatsiassaaq, tusagassiutinut nalunaarutimini allappoq.

Akisussaassuseqarnermik ujartuivoq

Folketingimi ilaasortap akisussaassuseqartumik politikkeqarnissaq ujartorpaa, inuussutissarsiortut namminersortut ernumalereersimapput, aalisarnermilu ajalusoorneq aallartereersimasoq oqaluuserisarlugu. Taamaasilluni Grønlandsbankenip pisortaata Martin Kviesgaardip, umiatsiaararsorluni aalisartut aningaasaqarneq piujuaannartitsinissarlu eqqarsaatigalugit imminut napatissinnaanngitsumik aalisarnerannik oqarnera, tikkuarpaa.

Umiatsiaararsorlutik aalisartut akuersissutaatillit ukiuni arfinilinni kingullerni 42 procentinik amerleriarsimapput.

- Naalakkersuitsut politikkiat piviusunik takunnissinnaassusermiinngilaq akisussaassuseqaranilu. Saarulliit ikilisarneri qalerallillu millingaluttuinnarneri tusartuarpagut. Taamaakkaluartoq pisassat Naalakkersuisunit amerlineqartuarput. Naalakkersuisut isitik matuinnartarpaat ajunnginnerpaamillu neriullutik. Apererusunnarpoq; angakkuarnertullusooq ittumik aalisakkat imartatsinni amerleriasaassappat – imaluunniit sunaana neriuutigineqartoq? Aaja Chemnitz Larsen aperivoq.

Aalisapilunneq unitsilli

Aaja Chemnitz Larsen isumaqarpoq saarlleqassuseq qaleraleqassuserlu pillugit oqallittarnerit erseqqilluinnartumik peqquteqartut. Qeqertarsuup Tunuani saarullinniarneq ukioq manna ingerlalluanngilaq, qaleralittassallu amerlineqartuarput, naak qalerallit milligaluttuinnartut.

- Isumatusaarluni aalajangertaraanni akisussaassuseqartumik aningaasaqarnermik ingerlatsisoqalersinnaavoq. Nunanut allanut niuernerput oqarluaannaraanni aalisarnermit tunngaveqarmat, aalisarneq inerisarumallugu aalisarnermi pisassanik tunniussisarnerit apeqquserneqarsinnaasariaqarput. Aalisapilunneq maannangaaq unitsinneqartariaqarpoq. Siunissami aalisartut piujuartitsinissaq tunngavigalugu aalisartuussapput, tamannalu angussagutsigu aalisartut biologillu peqataatilluarnissaat avaqqunneqarsinnaanngilaq, Aaja Chemnitz Larsen naggasiivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER