Aaja: Aalajangersimanerunissaa neriuutigigaluarpara
Danmarkimi naalakkersuisunngortussat partiillu tapertaasa politikkikkut isumaqatigiissuteqarneranni, Kalaallit Nunaata ilanngunneqarnera, IA-p folketingimut ilaasortaatitaata nuannaarutigaa.
Kalaallit Nunaat aamma Naalagaaffeqatigiinneq, Mette Frederiksenip SF-imik, Radikale Venstremik aamma Enhedslistenimik marlunngornermi unnukkut politikkikkut isumaqatigiissuteqarnerani oqaatigineqarput.
Kisianni isumaqatigiissummi 18-inik qupperneqartumi titarnernit marlunnit amerlanerusinnaasimanngilaq.
- Isumaqatigiissummi kalaallit ilaatinneqarnerisa iluatsinnera nuannaarutigaara, Aaja Chemnitz Larsen (IA) taama oqarpoq.
- Kisianni qulakkeerneqarneratigut, Kalaallit Nunaat pillugu immikkoortup aalajangersimanerunissaa neriuutigisimagaluarpara.
Isumaqatigiissummi oqaaseqatigiit imaapput ’Danmark Naalagaaffeqatigiinnermut ilaavoq. Naalakkersuisut nutaat naligiinnissamik, pitsaasumik aamma nukittorsakkamik Naalagaaffeqatigiinnermi tatigeqatigiinnermik ataqqeqatigiinnermillu tunngaveqartumik suleqatigiinnissamik kissaateqarput. Kalaallit Nunaat aamma Savalimmiut peqatigalugit danskit suliassaqarfii ineriartortissavagut.’ Isumaqatigiissummut aallarniummi tamanna allaqqavoq.
- Naalakkersuisut danskit suliassaqarfiisa ineriartortinnissaannut pisussaaffilernerat pingaaruteqartorujussuuvoq.
Kalaallit Nunaat pillugu oqaaseqatigiit attanneqartut
Kalaallit Nunaat pillugu oqaaseqatigiit aalajangersimasut isumaqatigiissummit peerneqangajakkaluarput. Socialdemokratietip aamma partiit tapertaasut pingasut akornanni isumaqatiginninniarnerit aallartinnginnerini, kalaallit ilaasortaatitaat marluk isumaqatiginninniarnissamut qaaqquneqarsimapput.
Kalaallit ilaasortat sapaatip-akunnerata siuliani tallimanngormat aggersarneqaqqipput. Piffissami tassani Kalaallit Nunaat pillugu pisussaaffiit isumaqatigiissummit peerneqarnialeraluarput.
- Isumaqatiginninniarnerup aappaani kalaallit toqqaannartumik ilanngunneqarnerisa attatiinnarneqarnissaata iluatsinneqarnera naammagisimaartorujussuuara. Minnerunngitsumik danskit akisussaaffeqarfii pillugit neriorsuut, Aaja Chemnitz Larsen (IA) oqarpoq.
Aki-Matilda Dam-Høegh (S) isumaqatiginninniarnerup aappaani ilaanngilaq, aggersaaneq sisamanngornermi unnukkut kingusissorujussuakkut takkuttoq arajutsisimagamiuk.
Meeqqat eqqugaaratarsinnaasut politiillu akissarsiaat
Piffissami aggersumi naalakkersuisut Kalaallit Nunaat pillugu pilersaarutaat ersarissarneqarnissaasa iluatsinneqarnissaat, Aaja Chemnitz Larsenip (IA) maanna neriuutigaa.
- Suliassanik aalajangersimasunik Mette Frederiksenimut saqqummiussassannik arlalinnik suliaqarpunga, taanna oqarpoq.
Aaja Chemnitz Larsenip (IA) immikkoortut naalakkersuisut pisussaaffigiligassaatut kissaatigisai ukuupput:
- Kalaallit Nunaanni meeqqanut eqqugaaratarsinnaasunut ikiuineq
- Inatsisinik atuutsitsinermik suliassaqarfimmik kivitsineq, tassani ingammik Danmarkimi aamma Kalaallit Nunaanni politiit akissarsiaasa assigiinngissusaannik piigaqarnissaq
- Kalaallit Nunaata nunanut allanut politikkimi nammineersinnaanerulersinneqarnissaa
Aningaasaqarnermut ministerimut allagaq
Tamatuma saniatigut kalaallit folketingimut ilaasortaatitaasa isumaqatiginninniarnissanut Kalaallit Nunaannut attuumassuteqartunut toqqaannartumik qaaqquneqartarnissaat qulakkeerniarpaa. Tamanna minnerunngitsumik aningaasanut inatsit pillugu isumaqatiginninniarnerni. Tamatuma ammaffigineqarnera qinersinissaq sioqqullugu oqaatigineqarnikuuvoq.
- Siulliit ilaattut aningaasaqarnermut ministeriaqarfimmut aamma inatsiseqarnermut ministeriaqarfimmukarniarpunga, taakku neriorsuutit piviusunngortinneqarnissaat qulakkeeriartorlugu, Aaja Chemnitz Larsen (IA) oqarpoq.
- Tamatuma saniatigut ministerinut Kalaallit Nunaannut pingaaruteqarnernut allagaqarniarpugut, toqqarneqarnerannik pilluaqqusilluta. Kisianni aamma suliassaqarfiit Kalaallit Nunaanni ingerlataat pillugit eqqaasinniarpagut.