isumasioqatigiinneq

Aaja: USA Pituffik pillugu oqaloqatiginera ajorpoq

Danskit nunanut allanut naalakkersuisuat Anders Samuelsen (LA) matoqqasumik isumasioqatigeerlugu IA-p folketingimi ilaasortaatitaata Aaja Chemnitz Larsenip, Pituffik pillugu pitsaanerusumik ammanerusumillu oqaloqatigiinnerit ingerlanneqartalernissaa ujartorpaa.

Aaja Chemnitz Larsen har i dag været i samråd med Anders Samuelsen. Samrådet var lukket og derfor er det sparsomt hvad der kom frem på mødet.

Upernaaq manna USA Pituffimmi milliardit sisamarterutaannik radarimik nutarsaaniarnera paasineqarpoq, tamannalu danskit nunanut allanut naalakkersuisoqarfianik Naalakkersuisunilluunniit ilisimatitseqqaarani pisimarpasippoq.

Ilisimatitsineq

Kalaallit Nunaat pillugu ataatsimiititaliaq ullumi Anders Samuelsenimit ilisimatinneqarpoq, ataatsimiinnerullu kingorna Aaja Chemnitz Larsen ima oqarpoq:

- Pituffimmi pisunut atatillugu oqaloqatigiinnerup taamaannera naammaginanngilaq. Kalaallit Nunaata soqutigisai Folketingittaaq aqqutigalugu isumaginiassagutsigit, ullumikkorniit ammanerusumik pissusilersortoqartariaqarpoq. Igalikumi Isumaqatigiissut illersornissallu iluani isumaqatigiissutit allat isumaqatigiissutaapput pingaarutillit. Tassanilu oqaloqatigiinneq diplomatiskiusumillu suleriarsinnaaneq apeqqutaapput. Taamaattumillu nunatsinni Naalakkersuisut danskillu naalakkersuisuisa nunatsinnut iluaqutaasussamik amerikkarmiunik oqaloqateqarnerunissaat naatsorsuutigaara, folketingimi ilaasortaq tusagassiuutinut nalunaarummi allappoq.

Isumasioqatigiinnermi qulequtaq alla aamma eqqartorneqarpoq. Tassa Pituffimmi kiffartuussinissamut isumaqatigiissut, tassani amerikamiut akisunerungaluarlutik isumaqatigiissuteqarfigineqarsimallutik.

Ileqqoq ajuusaarnartoq

- Ajoraluartumik Pituffimmi kiffartuussinissamut isumaqatigiissutit maannakkut kalaallinut/danskinut isumagineqartussanngortinneqaratik amerikkarmiunut tunniunneqartalerput. Tamanna Pituffimmi kiffartuussinissamik isumaqatigiissutip saniatigut aammattaaq Pituffimmiit/-mut imaatigut assartuussinermut atuuppoq, allaat amerikkarmiut neqeroorutaat RAL-ip neqeroorutaanit marloriaataanik sinneqartumik akisunerugaluartoq. Aappaagu timmisartuussineq pineqassaaq, tassanilu maannangaaq Kalaallit Nunaata soqutigisai qulakkeertariaqarpagut. Pituffimmi kiffartuussinissamut isumaqatigiissutit amerikkarmiunut tunniunneqartarneri Illersornissamut Isumaqatigiissutip siunertaanut uniuinerupput. Taamaattumik isumaqatigiinniarnissani massakkullu isumaqatigiinniarnerni Kalaallit Nunaata inissisimalluarnissaanut Folketingip danskit kalaallillu naalakkersuisuinut uteriisertuarnissaa uanni pingaaruteqarpoq, Aaja Chemnitz Larsen oqarpoq.

Powered by Labrador CMS