Aaja siulittaasuuffik pillugu: Pakatsinarpoq
IA sinnerlugu folketingimi ilaasortap Aaja Chemnitz Larsenip, siumumeersup Aki-Matilda Høegh-Damip Kalaallit Nunaat pillugu ataatsimiititaliami siulittaasunngornera naammagisimaanngilaa.
Kalaallit Nunaat pillugu ataatsimiititaliami Aki-Matilda Høegh-Dam ukiuni marlunni siullerni siulittaasuussasoq ataasinngornermi saqqummiunneqarpoq. Aki-Matilda Høegh-Dam siulittaasooreerpat suleqataa, IA-meersoq Aaja Chemnitz Larsen, siulittaasuulissaaq.
IA sinnerlugu politikerip tamanna naammaginngilaa, KNR-imummi ima oqaaseqarpoq:
- Takorusussimagaluarpara kalaallit qinersisartut amerlanerussuteqartut taasimasaat Socialdemokraatinit siulittaasunngortinneqassasoq, taamaalilluni IA siulliulluni siulittaasuuffeqartinneqarluni. Qinersinermimi amerlanerussuteqartunit taaneqarpugut, Folketingimilu ilaasortaatitaqartuni anginersaalluta. Taava paasiinnarpara Socialdemokraatit partii tunuliaqutaasoq pingaartinnerusimagaat, tamannalu pakatsinarpoq, Aaja Chemnitz Larsen KNR-imut oqarpoq.
Ataatsimiititaliami siulittaasup tulliatut ukiuni marlunni siullerni issiagallassaaq. Folketingimi ilaasortaqatinilu ukiut marlunni issiareerunik ataatsimiititaliami issiavimminnik paarlaassapput.