Aaja piviusulersaarutip kingorna: Kannguttaatsuliortuusut Tasiilamiit qimagutinneqassapput

Aaja Chemnitz Larsen (IA) kannguttaatsuliortuusut Tasiilamiit qimagutinneqartassasut isumaqarpoq

- Søren Espersenip (DF) iliuuseqartoqartariaqarneranik oqariartuutaa isumaqatigaara, kisiannili
meeqqat pinngitsaalisamik qimagutinneqarnissaannik oqariartornera
isumaqatiginngilluinnarpara. Akerlianilli kannguttaatsuliortuusut najugaqarfinnit minnerniit,
soorlu Tasiilamiit qimagutitinneqartariaqarput.

Folketingimi ilaasortaq Aaja Chemnitz Larsen (IA), Tasiilami kinguaassiutitigut kanngutsaattuliortarneq imminullu toquttarnerit pillugit sakkortuumik piviusulersaarutip 'Byen hvor børn forsvinder' DR2-kkut takutinneqarnerata kingorna tusagassiutinut taama nalunaaruteqarpoq.

Aaqqiissutissatut siunnersuut

Aaja Chemnitz Larsenip oqaatigaa, suliaq tamanna qaqilertorsimangaluarlugu, angusaqarsimananili.

Aaja ukioq manna oqallissaarummik saqqummiivoq, tassanilu Tasiilap inuit atugaasigut
ikiortariaqavissutut inissinnissaanik inassuteqarsimavoq, aaqqiissutissatullu tigussaasutut
arfinilinnik siunnersuuteqarluni, ilaatigut inatsisinik atuutsitsinerup iluani Tasiilatut sakkortuunik
pisoqarfiusartunut immikkut aningaasaliisoqarnissaanik siunnersuuteqarluni. Tamanna pillugu
inatsisinik atuutsitsinermut ministeri oqaloqatigisimavaa, taannalu ikiuukkusussuseqarpoq.
Taamanikkulli qisuariartoqanngilaq, tamannalu eqqarsarnartoqartippaa.

Tasiilami taamaallaat ajornartorsiortoqanngitsoq

- Taamak annertutigisumik anniaateqarneq isigalugu ajoqaaq,
iliuuseqarfigerusunnaqaarlu. Uanga taamatut misigisimavunga. Kommunip Naalakkersuisut
peqatigalugit suliniutissarpassui pisariaqartinneqarput, uangalu Folketingimiit ikiuukkusuppunga, taanna oqarpoq.

- Immikkut iliuuseqartoqarnissaa Tasiilami pisariaqartinneqarpoq, akisussaaffimmillu
tiguseqataarusuppunga. Tasiilami kajumissutsimik aallaaveqartumik tunniussassaqartoqarlunilu
pikkorissunik sulisoqarpoq, taakkualu peqatigalutigit ataatsimut iliuuseqarnissarput pisariaqartoq
isumaqarpunga. Eqqorneqartut inatsisitigut inissisimaffiisa nukittorsarneqarnissaannut,
taamatullu kannguttaatsuliortut nigortinneqarnissaannut inatsisip periarfissiinissaanut
tunngasutigut misissuerusuppunga. Ajornartorsiut Tasiilamiinnaq piunngilaq, ataatsimulli
isigalugu sumiiffinni inukitsuni kannguttaatsuliortup aqqusinerni naaperiataarsinnaanera
kannguttaatsuliorfigitissimasumut eqquisuusarluni, IA-mi politikkeri oqarpoq.

Powered by Labrador CMS