Aaja Papemut assuarliisoq
Folketingip ammaanersiorneqarnerani oqallittoqarmat Aaja Chemnitzip Søren Pape "Kalaaallit Nunaat Afrikasoq sikulik" oqarsimanersoq paaserusussimava.
Ministeriunerup Folketingimi ammaanersiorluni oqalugiaataa sisamanngornermi oqaluuserineqarpoq, tassungalu atatillugu Aaja Chemnitzi Konservativet siulittaasuannut Søren Pape Poulsenimut ministeriuninngornissani anguniarlugu qineqqusaarniarluni oqarsimasumut uissuumminartumik apeqquteqarsimavoq.
Aaja Chemnitzip oqaatigaa, inunnit imminnut atassuteqanngitsunit arlalinni oqaluttuunneqarsimalluni, Søren Pape Poulsenip pisortatigoortumik ataatsimiittoqarnerani "Kalaallit Nunaat Afrikasoq sikulik" oqarsimasoq.
Tamanna ilumoornersoq Søren Pape Poulsenimut uppernarsaqqusimavaate.
Søren Pape Poulsenilli tamanna eqqaamasinnaanagu akissuteqarsimavoq:
- Tujorminartumik oqaaseqarsimasinnaasoq
Taamatut oqaaseqarsimassanguma uppernarsaammik takorusuppunga, oqaasissakkali mianersuutissavakka, Kalaallimmi Nunaanni meeqqanik kinguaassiuutitigut atornerluisoqartarneranik inuuniarnikkullu ajornartorsiuteqartoqarneranik annertuumik unammilligassaqartoqarneranut atatillugu isummanik nuannerpallaanngitsunik annissisimasinnaavunga, qularnanngitsumik tujorminartumik oqaaseqarsimasinnaallunga, Søren Pape Poulsen oqaluttarfimmiit akilluni oqarpoq, nangillunilu:
- Taamatorpiarli oqaaseqarsimanerangaanera eqqaamasaqarfiginngilara.
Søren Pape Poulsenip taamatut oqareerluni oqaatigaa Kalaallit Nunaat nuannarisupilussuullugu:
- Immitsinnut ajunngitsumik pisussaavugut, taamaakkaluartorli unammillernartoqarnera isiginngitsuusaassanngilarput, taanna oqarpoq.
- Ataqqinninnginnerusoq
Aaja Chemnitzip oqaaseqaanni malitseqartillugu oqaatigaa, taamatut oqaaseqarsimaneq ataqqinninnginnerusoq, naalagaaffeqatigiinnilu suleqatigiit imminnut ataqqeqatigiinnissaat pingaaruteqartoq kiisalu immitsinnut ajunngitsumik oqaluuttartussaasugut.
Søren Pape Poulsen tamatumunnga isumaqataavoq.
- Suleqatigiilluartussaavugut. Nunarsuarmi nalorninartoqarneruleriartorpoq, tamannalu eqqarsaatigalugu suleqatigiinnerusariaqarpugut, taanna oqarpoq.
Aaja Chemnitzip SermitsiaqAG-mut itisiliilluni oqaatigaa, Søren Pape Poulsenip taamatut oqaaseqarsimasutut oqaatigineqarnera ilumoornersoq paasiniarlugu assuarinnissimalluni, tassani ministeriuninngorsinnaammat Kalaallit Nunaannut qanoq isiginninnersoq paaserusussimagamiuk:
- Inuttut qanoq ittuunersoq aamma qanoq isumaqarnersoq paaserusussimavatra, taanna oqarpoq.