Aaja naliliisoq: Isumaqatiginninniarnerit qaammat ataaseq suli ingerlassagunarput

Danmarkimi nutaanik naalakkersuisunngortitsiniarluni isumaqatiginninniarnerit ministeriunerup najugaqarfianit Marienborgimit Christiansborgimi ministeriuneqarfimmut nuunneqarsimapput. Kunngikkormiut misissuisitaata Mette Frederiksenip (Soc.) sisamanngornermi isumaqatiginninniarnerit nangillugit ingerlatsinermini aningaasaqarneq isumaqatiginninniutigissavaa, isumaqatiginninniarnerit allartimmata peqqinnissaq isumaqatiginninniutigineqarsimalluni.

Kalaallit Nunaannit Folketingimut qanittumi qinigaaqqittup Aaja Chemnitzip (IA) oqaluttuaraa, Danmarkip iluani pissutsit pillugit maanna oqallittoqarneranut peqataanani, naatsorsuutiginerarpaali sapaatip-akunnerata tulliani Mette Frederiksenimik ataatsimeeqateqaqqissalluni:

- Isumaqatiginninniarnernut suli peqataavugut, kingusinnerusukkullu aggersarneaqassalluta, taanna Sermitsiaq.AG-mut oqarpoq.

Aaja Chemnitsip Danmarkimi qaqugu nutaanik naalakkersuisoqalersinnaaneranik naatsorsuuteqarnini imatut oqaatigaa:

Peqataatinneqarnissaq naatsorsuutigineqartoq

- Christiansborgimi oqaluuserineqartututu ukiortaami juullimiluunniit tamatuma pinissaa ilimaginngilara. Isumaqarpunga sapaatip-akunnialui ingerlassasut. Eqqoriarsinnaavara, qaammat ataaseq qaangiuppat.

- Taamaaratarsinnaavoq, maannakkorpiarli apeqqutit qitiusut ilaannut atatillugit imminnut nassaariniarlutik isumaqatiginninniarnissaq pisariaqartippaat, soorunami naatsorsuutigaara peqataatinneqassalluta, Aaja Chemnitz oqarpoq.

Mette Frederiksen Danmarkimi partiit saamerliit talerperlillu akornanni naalakkersuisunngortitsiniarsarivoq, sisamanngornermilu Ritzau-imut oqaatigalugu, sapinngisimanik iliuuseqarluni:

- Kunngikkormiut misissuisitassaatut toqqagaasimavun ga, naalakkersuisunngortitsiniarlun galu sapinngisara tamaat iliuuseqarlunga.

Piumasaqaatit tigulluarneqarsimasut

- Piffissaq atortariaqartoq atorneqartussaavoq. Partiit naalakkersuisunngortitsiniarnermi issiaqatigineq ajukkat issiaqatigineqarput. Ullormiillu ullormut isumaqatiginninniarnerit naammassineqarsinnaanatik, Frederiksen Ritzau naapertorlugu oqarsimavoq.

Aaja Chemnitzip naalakkersuisunngortussanut tapersiissagunik IA-mit piumasaqaatigineqartut qulit Mette Frederiksenimut tunnissimavai.

Apeqqut: Piumasaqaatit qulit taakku ministeriunermut tunniussimasatit qisuariarfigineqarpat?

- Aap, Socialdemokratineersut oqaloqatigigaangatsigit piumasaqaativut misissorniarlugit qanorlu iliuuseqarsinnaanerlutik oqaatigisarpaat, taamaammat piumasaqaativut Socialdemokratinit tigulluarneqarsimasut misigisimavunga.

Partiit talerperliit kisimik naalakkersuisuutitaqarsinnaanerannut tapersiinianngitsoq

- Tamanna nuannaarutigilluinnarpara, taakkuuppummi kunngikkormiunit misissuitinneqartut aamma kikkut naalakkersuisuutitaqaleraluarpataluunniit piumasaqaatitta pivisunngortinneqarnissaannut qulakkeerinneqataasinnaasut, Aaja Chemnitz oqarpoq.

Politikkerip Socialdemokratiinnanngitsunik partiinilli allanik aamma ataatsimeeqateqarsimanini isertuutinngilaa. Aaja Chemnitzip tassunga atatillugu erseqqissaassutigaa, partiit talerperliit ataatsimeeqatigisimagaluarlugit, partiit talerperliit kisimik naalakkersuisuutitaqarnissaannut tapersiinaviarani:

- Isumaqarpunga aallaqqaammut erseqqissaassutigissallugu pingaaruteqartoq, partiit talerperliit kisimiillutik naalakkersuisuutitaqarnissaannut tapersiinaviannginnera, IA-mimi naleqartitat partiini talerperliunerusuni DF-imi, DD-mi imaluunniit Nye Borgerligikkunni takusinnaanngilakka, taanna oqarpoq.

Aaja Chemnitzip kisimiilluni Lars Løkke Rasmussenip partiia Moderaterne suleqatigalugu partiit talerperliit amerlanerussuteqartilersinnaagaluarpai, tamannali pinavianngitsoq oqaatigalugu. Maannakkorpiaq kikkut naalakkersuisuutitaqalissanersut oqaatigiuminaappoq aamma Kalaallit Nunaannit qinigaasut qanoq sunniuteqartigisinnaanerat oqaatigiuminaalluni:

Siumut: Nutaarsiassaanngilaq

- IA maannakkorpiaq amerlanerussuteqartitsilersinnaavoq, isumaqatiginninniarnerilli qanorluunniit inerneqarsinnaapput, taamaammat partiinik amerlanerusunik suleqateqarnissamut ammasuunissaq pingaaruteqarpoq, soorunami naalakkersuisuutitaqalertussautntapersiisumik iliuuseqassaagut.

Kalaallit Nunaannit folketingimut ilaasortanngortup aappaata Aki-Mathilda Høegh-Damip siunnersortini aqqutigalugu ilisimatitsissutigaa, Danmarkimi nutaanik naalakkersuisunngortitsiniarluni isumaqatiginninniartarnerit Siumumut nutaarsiassaanngitsut.