Aaja Issittumi nunanut allanut ministerinut inassuteqaatinik nassiussuisimasoq

Inuit Ataqatigiit sinnerlugit Folktingimi ilaasortaq Aaja Chemnitz Larsen, issittup inatsisartuisa ataatsimiititaliaanni (SCPAR) qanittukkut siulittaasunngortoq sulilluni aallartissimavoq.

Pisortatigoortumik allakkamini, issittumi naalagaaffiit nunanut allanut ministeriinut nassiussimasamini, siulittaasunngorlaap suliassaqarfiit pingasut qitiutillugit suliariniakkani oqaatigai: Silap pissusaata allanngoriartornera, attanneqarsinnaasumik inussutissarsiutinik ineriartortitsineq issittumilu innuttaasut.

Aaja Chemnitz Larsen Issittup Inatsisartui apriilip 13-14-iani ataatsimeersuarmata siulittaasutut toqqarneqarpoq. Issittup Inatsisartuini politikkerit tamarmiusut inassuteqaasiorsimapput, siulittaasunngortup Issittumi Siunnersuisoqatigiit ataatsimiinnissaat sioqqullugu Issittumi nunanut allanut ministerinut maanna nassiussimasaanik

- Siulittaasutut marlunnik anguniagaqarpunga, tassa ilaatigut Issittup Inatsisartuini suliatta innuttaasunut ammanerutinneqarnissaasa, ilaatigullu nunani issittuniittuni tamani innuttaasut peqataatinneqarnerunissaasa qulakkeerneqarnissaat.

Tulliani Nuummi ataatsimeersuartoqassasoq

Ukioq allortarlugu ataatsimeersuartoqartarpoq, 2022-milu ataatsimeersuarneq Nuummi ingerlanneqassalluni. Ataatsimeersuarnermi tassani innuttaasut politikkikkut inassuteqqatissanik, naalakkersuisunut ingerlateqqinneqartussanik ilusilersueqaataanissamut peqataatinneqassapput.

Aaja Chemnits Larsenip Nuummi ataatsimeersuartoqarnissaa sioqqullugu ataatsimiititaliami suliaqarneq pillugu soqutiginnitsilersinnaalluni neriuutigaa.

- Issittumi ineriartortitsinermut iluaqutaasussamik suliaqarnitsinnut amerlanerit peqataatikkusuppakka, ataatsimiinnermi, Issittumi angalanitsinni, aammali inuit attaveqaqatigiittarfii aqqutigalugit, Facebookikkut quppernermik pilersitsiniarpugut, Kalaallit Nunaanni Issittumilu nunani allani soqutiginnittut tamarmik suliatsinnut malinnaasinnaaqqullugit.

Ammanerusumik suliaqarlunilu oqallitsitsisarnerup saniatigut Aaja Chemnitz Larsenip siulittaasutut suliassaqarfiit pingasut immikkut suliariniarpai.

-Issittumi naalakkersuisunut inassutigaarput, silaannarmut atatillugu suliatik nukittorsassagaat, Parisimi isumaqatigiissummi anguniakkat anguneqarnissaat siunertaralugu. Ukioq manna immikkut nunaarutissaavoq, IA-p Naalakkersuisuutitaqalerneratigut anguniarneqarmat, Kalaallit Nunaata Parisimi isumaqatigiissummut atsiorniarnera.

Allagaq Bidenip nunanut allanut ministerianut nassiunneqarsimasoq

Aaja Chemnitz Larsenip silap pissusaata sammineqarnerata saniatigut Issittsumi inuussutissarsiutinik ineriartortitsinissaq pillugu suleqatigiinnerup nukittorsarneqarnissaa ukkatariniarpaa, tassa nunanit allanit aningaasaliissuteqarsinnaasut kajumissuseqalersinniarpai.

- Issittumi sorsuttoqaranilu patajaattumik ingerlasoqarnissaa inuussutissarsiutinik ineriartortitsinissamut pingaarutilittut tunngaviupput, tamanna tamaviaarluta sulissutigissavarput, aamma isumaqarpugut Issittumi inuusuttut Issittup ineriartortinneqarneranut peqataatinneqassasut, kiisalu ”avannaaniit avannaanut” pilersaarusiornitsigut Issittumi inuusuttunik paarlaasseqatigiittarnerup pitsaanerulernissaa anguniassavarput.

Qitiutillugit suliariniakkat pingasut pillugit allakkat nunat issittumiittut nunanut allanut ministeriinut nassiunneqarsimapput, tassa ilaatigut Joe Bidenip qanittukkut nunanut allanut ministerinngortitaanut Antony Blinkenimut aamma Ruslandimi nunanut allanut ministerimut Sergej Lavrovimut nassiunneqarsimapput.

Issittumi Siunnersuisoqatigiit maajip 20-ani Reykjavikimi ataatsimiissapput, tassani Aaja Chemnitz Larsen peqataassaaq.