Aaja issittoq pillugu Komitémi siulittaasunngorpoq

Nunatsinniit folketingimut ilaasortaq Aaja Chemnitz Larsen issittumi inatsisartuni ilaasortaatitaasut ataatsimiititaliaanni siulittaasunngorpoq.

Aaja Chemnitz Larsen nunat tamalaat akornannni ataatsimiititaliami, Standing Comittee of Parliamentarians of the Arctic Region (SCPAR), issittoq pillugu ataatsimiititaliamik aamma taaneqartartumi siulittaasunngorpoq.

Folketingimut ilaasortaatitap ataatsimiititaliami siulittaasunngornera peqatigalugu nunarput issittoq pillugu ineriartortitsinissamut oqallinnermi sunniisinnaassuseqarnerulerpoq.

- Ataatsimiititaliaq (Komité, aaqq.) immikkuullarilluinnarpoq, issittummi naalagaaffiini inatsisartuni ilaasortat issittup ineriartornissaa aamma pisariaqartitai pillugit tassani oqallittarput. Issittoq pillugu soqutiginninneq annertuvoq, taamaammat issittup sakkuaaffiunnginnissaa patajaatsumillu ineriartornissaa pillugu uanga ataatsimiititaliamilu ilaasortat annertuumik naatsorsuuteqarfigineqarpugut, Aaja Chemnitz Larsen siulittaasunngornerminut atatillugu oqaaseqarpoq.

Chemnitz Larsen Folketingi sinnerlugu ukiuni arfinilinngulersuni ataatsimiititaliami sinniisuusimavoq. Maannalu siulittaasutut taaneqarami tamanna tatiginninnermik annertuumik nalunaarnertut isigaa.

- Nunarput Danmarkilu sinnerlugu naalagaaffiit inatsisartuini sulininnut atatillugu issittoq pillugu komitemi sulivunga. Taamaasillunga issittumi ineriartornissaq annertuumik sunneeqataaffigisinnaavara. Siulittaasuuffik periarfissiivoq nunatta naalagaaffeqatigiinnerullu oqaluuserisassani pingaaruteqartuni sunneeqataanerunissaanut. Sulinissanut qilanaarpunga, Aaja Chemnitz Larsen oqarpoq.

Issittoq ukkanneqarnerusoq

Issittoq nunarsuarmi pissaaneqarnerusunit ukiuni kingullerni soqutigineqarnerulersimavoq, taamaattumillu nunarput Danmarkilu aamma nunat tamalaanit soqutigineqarneq malillugu ukkassinerulersimallutik.

Siulittaasunngortup erseqqissarpaa issittup ineriartortinnissaanut Issittoq pillugu Ataatsimiititaliaq ataatsimoorluni sunneeqataajumaartoq, ukiunilu tullerni suleqatigiinneq pisariaqartinneqaleraluttuinnartoq.

- Ataatsimiititaliami sulineq sunniuteqarnerlu aamma annertuneruleraluttuinnarsimavoq, tamannalu nunatsinnut Naalagaaffeqatigiinnermullu periarfissatsialassuuvoq, Aaja Chemnitz Larsen oqarpoq.

Sammisat inunnut qanilaartut

Ataatsimiititaliaq 1993-imi pilersinneqarpoq. Nunat USA, Canada, Rusland, Danmark/Savalimmiut/Kalaallit Nunaat, Sverige, Norge, Finland aamma Island sinniisuutitaqarput. Soorlu aamma EU, Vestnordisk Råd, Nordisk Råd sinniisuutitaqartut.

Ataatsimiititaliap issittumi innuttaasut ulluinnarni malugisinnaasaat soqutigisaallu ukkatarineruai. Soorlu silap pissusiata allanngoriartornera, nunap inoqqaavisa pisinnaatitaaffii, angallanneq nunallu ataqatigiissaarfii, digitalinngorsaaneq, ilinniartitaaneq inuussutussarsiutitigullu ineriartortitsineq.

- Assersuutigalugu Arktisk Rådimi sammisat issittumut tunngaannaratik aammali nunat tamalaat akornanni soqutigisanut tunngasinnaasartut, taamaattoq uagut ataatsimiititaliami sammisatut Issittumut innuttaasunullu tunngalluinnartuupput. Tamanna nukittoqutigaarput, sulinerpullu isumaqarluinnartuuvoq. Sulininni Issittumi inuiaqatigiit inuuniarnermikkut atugaanni pitsanngorsaanissaq soqutigisarilluinnarpara, maannalu sulininni nukittorsaanissannik periarfissaqalerpunga, Aaja Chemnitz Larsen oqarpoq.

Powered by Labrador CMS