Aaja DK-mit ikiorsiissutit pillugit: Iluatsitsilluarneq qularnartoq
Folketingip Kalaallit Nunaannut Ataatsimiititaliaata isumaginninnermi ministeri Astrid Krag ataatsimeeqatigiumasimavaa. 80 millioner koruunit Danmarkip Kalaallit Nunaanni meeqqanut atugarliortunut aningaasaliissutigisimasai pillugit suliaq qanoq ingerlasimanersoq pillugu oqaluttuartinniarlugu.
80 millioner koruunit Danmarkip Kalaallit Nunaanni meeqqat atugarliortut ikiorserneqarnissaannut aningaasaliissutigisimasai pitsaanerpaamik atorneqarsimanngillat, folketingimi ilaasortaq Aaja Chemnitz Larsen (IA) oqarpoq.
Taanna isumaqarpoq, aaqqiipallattarnerit inituallaartut. Aaqqiipallassimanermut atatillugu assersuutigalugu oqaatigaa, meeqqat kinguaassiuutitigut innarlerneqarsimasut ikiorserneqarnissaannut Kalaallit Nunaanni intsisip malinneqarnissaanut Danmarkimi isumaginninnermi siunnersortit Kalaallit Nunaanni kommuninut ikiorsiiartortillugit aallartinneqarsimanerannut aningaasat atorneqarsimasut. Imaluunniit kukkusumik atorfinitsitsisimanerit akisuallaarsimasutt.
- Nammineq inatsisitsinnik malinninnissamut ikiorserneqassagutta aaqqiipallannerullunilu taamaatiinnarneruvoq. Kommunit iluamik suliaqarsinnaasimanngillat, aamma Kalaallit Nunaata inatsisaanik malinninnissamut atatillugu inatsimmi amigaatigineqartut aaqqiiffigineqartariaqarsimapput.
- Meeqqat pitsaanerusumik ikiorserniarlugit suliniutigineqarsimasut siunnerfilersorneqarsimannginnerat ernumanarpoq. Meerartatta atugarliortut ikiorserneqarnissaat qulakkeerniarlugu inuiaqatigiittut tunngaviusumik suliassatta Nunatsinni naammassineqarsinnaannginnera ernumanarpoq, Aaja Chemnitz Larsen oqarpoq.
Ministeri ataatsimeeqatigiumaneqartoq
Aaja Chemnitz Larsenip oqaluttuaraa, Folketingip Kalaallit Nunaannut Ataatsimiititaliaata isumaginninnermi ministeri Astrid Krag (Soc.) ukioq naatinnagu ataatsimeeqatigiumasimagaa. Ataatsimiinnermi ministerip aningaasat qanoq atorneqarsimanersut ataatsimiititaliamut itisilerlugit oqaluttuarissagai piumasaqaataasimavoq.
Martha Lund Olsenip sapaatip akunnerani kingullermi Danmarkimit aningaasaliissutit miliuunilikkaajusut pillugit oqallinneq aallartippaa. Martha Lund Olsen Kommuneqarfik Sermersuumi isumaginninnermut pisortaasimasutut isumaqarpoq, aningaasat meeqqanut atugarliornerpaanut iluaqutaasimanngitsut. Aningaasalli Isumaginninnermut Aqutsisoqarfiup annertusarneqarnissaanut atorneqarsimasut pisortaasimasup isornartorsiuilluni oqaatiginikuuaa.
Meeqqanut, Inuusuttunut Ilaqutariinnullu Naalakkersuisup Paneeraq Olsenip (N) isornartorsiuineq akerlilerlugu oqaatigisimavaa, aningaasat immikkoortinneqarmata, aqutsisoqatigiit inassuteqaataasa 16-iusut akornanni aqqanilinnut atorneqarsimasut.
Aaja Chemnitz Larsenip aningaasat sumut atorneqarsimanersut Folketingimi Danmarkimi naalakkersuisunut apeqqutigisarsimavaa.
- Suliniaqatigiiffiit tusaaniarneqarnerusimasinnaasut
Pikkuginnippallaanngilaq, suliaqarsimanerlu 'qularnartumik iluatsitsilluarsimanertut' oqaatigalugu.
-MIO suliniaqatigiiffiillu meeqqanik sullissisartut aqutsisoqatigiit suliniutissatut ilusilersuimmata tusaaniarneqarnerusimasinnaagaluarput.
- Tamaasa ataatsimut isigissagaanni isumaqarpunga suliassami kukkusimalluta. Immikkut illuinnartumik periarfissaq iluamik atorsimanngilarput, Aaja Chemnitz Larsen isumaqartoq aningaasat amerlanerusut pinaveersaartitsinermut atorneqarsimasinnaagaluartut oqarpoq:
- Meeqqap innarlerneqarsimasup ikiorserneqarnissaa pissusissamisuuginnartussaagaluarpoq. Danmarkimit ikiorsiissutit tamatumunnga iluaqutaasinnaappata qujanassaqaaq, meeqqanilli innarliisarnerpassuit unitsinngikkutsigit inuiaqatigiittut immitsinnut artukkertuassaagut.