Skip to main content

Aaja DF-imut: Iluareqqusaarpasittumik oqaaseqartarnerit taamaatinneqarlik

Inuit Ataqatigiit folketingimut ilaasortaatitaata Aaja Chemnitz Larsenip tallimanngornermi apeqquteqaat naapertorlugu oqallinnermi Dansk Folkeparti isornartorsiorpaa.

- Uanga kalaallit namminersulernissamik kissaataat Dansk Folkepartiimiit taamatut ipitinniarneqartillugu namminersulerusunnermik kissaatip annertusiartornissaanik isumaqarpunga. Kalaallini inuiaqatigiinni amerlanerit namminersulernissamik anguniagaqarput. Tamannalu tamatsinnit ataqqineqartariaqarpoq.

Folketingimut ilaasortaq Aaja Chemnitz Larsen (IA) tallimanngornermi Folketingimi oqallinnermi taama oqarpoq.

Tassani Søren Espersenip, kalaallit namminiilivinnissamut ingerlanerat aamma nunap aningaasaqarnera pillugu Lars Løkke Rasmussen (V) paasissutissiinissaanik qinnuigisimavaa.

Atuaruk: DF-imi oqaaseqartartoq: Kalaallit Nunaat aningaasaqarnikkut ajalusuulerpoq

Espersen isornartorsiorneqartoq
Kalaallit inuiaqatigiit amerlanerussuteqartut namminiilivinnissaq anguniagarigaat, Aaja Chemnitz Larsen erseqqissaavoq.

- Namminersulerusunneq kalaallini misigissusaavoq ingerlassaallunilu, soorlumi inuianni allani taamaattoqartartoq. Misigissuseq tamanna naalagaaniarfigineqarnikkut unitsinneqarsinnaanngilaq aanngartinneqarsinnaananilu. Qaammatini kingullerni Kalaallit Nunaat pillugu Danmarkimi oqallinneq iluareqqusaarpasittumik oqaaseqartarnernit sunnersimaneqarpoq. Kalaallit Nunaanni Namminersorluni Oqartussaaneq utertinneqartariaqartumik Dansk Folkepartip oqaaseqarnera Danmarkip Kalaallit Nunaatalu suleqatigiinnissaannut iluaqutaanngilaq. Akerlianilli ajoqutaavoq, taanna Søren Espersenip kingullertigut oqaaseqarneranut isornartorsiorpoq.

Atuaruk: Løkke: Kalaallit Nunaat namminersortoq aningaasaqarnikkut namminiissaaq

Suna tamaat akigalugu namminersulerneq
Kalaallit Nunaanni amerlanerussuteqartut tuaviuussamik namminiilivinnissamik kissaateqannginnerat, Aaja Chemnitz Larsenip aamma oqaatigaa.

- Suna tamaat akigalugu namminersulissagutta inuiaqatigiinni sanngiinnerusutut inissisimasorpassuit katatarisinnaavagut. Inuit Ataqatigiinni inuit tamarmik peqataanissaat pingaaruteqarpoq – aamma inuiaqatigiinni sanngiinnerusut. Inuiaqatigiit inuttut atukkatigut aningaasaqarnikkullu imminnut nammassinnaanissaat anguniagaassaaq.

- Imaaginnanngitsoq inuiaqatigiit namminersortut, inuiaqatigiilli atugarissaartumik namminersortut. Demokratiimik paasinninneq, inuttut pisinnaatitaaffinnut ataqqinninneq ataasiakkaallu isumannaatsuunissaat, tamakkuupput Kalaallit Nunaata Danmarkimiit kusanarnerpaatut ilikkagaqarfigisimasai, tamakkulu pillugit qujavugut, taanna oqarpoq.

Ingerlavissaq suli annertusoq
Inuit Ataqatigiinniit inuiaqatigiit kalaallit aningaasaqarnikkut nukittuut nutaaliaasullu, amerlanerillu peqataaffigisinnaasaat sulissutigineqarput.

- Ullumikkut ilorraap tungaanut ingerlavugut, ingerlavissarpulli suli annertuvoq. Kalaallini inuiaqatigiinni piitsut pisuullu imminnut ungasipput. Kalaallit Nunaanni aningaasaqarnikkut inuttullu atukkatigut amerikkarmiut naligiinngitsumik inissisimanerannut eqqaanartumik naligiinngittoqarpoq. Inuit Ataqatigiinniit annertunerusumik naligiittoqalernissaanik sulissutiginnippugut. Meeqqat amerlavallaat atugarliortuupput angerlarsimaffiullu avataani najugaqarlutik. Naalakkersuisuneeqataanitsigut meeqqat tamarmik toqqissisimasumik meeraaffeqarnissaannik, akisussaaffimmillu tigusaqarlutik nukittunerusunik ilaqutariinnik qulakkeerinninnissamik sulissuteqarpugut. Ikippallaartut meeqqat atuarfiannik naammassinnittarput atuaqqillutillu. Taamaattumillu meeqqat atuarfiata nukittorsarneqarnissaanik taamatullu amerlanerit atuarnerminnik naammassinnittarnissaannik Inuit Ataqatigiinniit suliniuteqarnissaq pingaaruteqarpoq, Aaja Chemnitz Larsen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER