Aaja Chemnitz: Ilinniartut Københavnimi kolligiassaqalilerput
Kalaallit ilinniartut 2023-p aasaaneraniit Københavnimi kollegiaqalernissaat piviusunngortussanngortutut isikkoqarpoq. Suliassat kingulliit inissinneqarnissaat amigaataavoq, Aaja Chemnitzili isumalluarpoq.
Aaja Chemnitzip (IA) oqaatigineqareersutut folketingimut qineqqusaartoqarnerani arlaleriarluni oqaatigisarsimavaa, kalaallit Københavnimi ilinniartut atlantikup avannaata kollegiaani ineqartinneqartassasut.
Soorlumi aasaru 2023-imi inissat 20-t nunatsinniik ilinniartunut iluatsinnguatsiartut. Aaja Chemnitz facebookikkut allappoq.
Aaja Chemnitzip oqaatigaa, kollegiani inissaqarnissamik kissaateqarneq Danmarkimi ilinniatut kattuffianit, AVALAK, saqqummiunneqarsimasoq, tamannalu tunngavigalugu IA kunngikkormiunit misissuitinneqartumik Mette Frederiksenimik aamma Christiansborgimi partiit siulittaasuinik allanik isumaqatiginninniarnissamut qulinik piumasaqaateqarsimavoq.
- Iluatsinnguatsiarpoq kollegiataarnissaat. Kalaallit Illuutaat ujaarlingaatsiarnikuuvoq kollegiassamik. Maannalu periarfissipput pissanganarporlu iluatsissanersoq.
Aaja Chemnitz allappoq, kollegiat anginerusut kalaallinut ilinniartunut 20-30-nut inissaateqarnersut misissorneqarsimasoq, kollegiat igaffimmik inimillu ataatsimoorfissartallit tassani pineqarlutik.
- Nuannaalereernianngikkaluarlunga soorlumi aasaru 2023-imi inissat 20-30-it nunatsinniik ilinniartunut iluatsinnguatsiartut, folketingimi ilaasortaq neriuuteqarluartoq oqarpoq.
Aaja Chemnitz isumaqarpoq, Danmarkimi ukioq siulleq ilinniartunut inissaqartitsinerup ilinniarnerminnik unitsitsisut ikilisittarai ataatsimoornerlu nukittorsartarlugu.
- Iluatsissappat nalunaarutigissavara, maannalu assakka paarlassavakka iluatseqqullugu.
Aningaasaatilissuaq ilinniartunut atlantikup avannaaneersunut inissaqartitsisumik kollegialiorniartoq
Suliniut alla isumagineqaleruttorpoq. Aaja Chemnitzili suliniummut pineqartumut attuumassuteqanngilaq. Danskeq aningaasaatilissuaq Københavns Nordvestkvarterimiittumi Glasvejimi sanaartorfissatut toqqavimmik pisiaqarsimavoq, tassani inuusuttunut inissianik 50-inik sanaartornissaq pilersaarutigalugu. Aviisi Berlingske taamatut allappoq.
Inissiat nutaat ilaat ilinniartunut atlantikup avannaaneersunut atugassiaassapput, aningaasaatilissuaq Berlingskemut oqaluttuarsimavoq.
- Københavnimi inissaminnik akilersinnaasaminnik nassaarniarneq annertuumik ajornartittarpaat. Danskimmi Københavnimiitut amerlanerit assigalugit attaveqaateqanngillat, Niklas Nikolajsen nassuiaavoq.
Kollegia aataqqiiminut J.F. Kjølbro-mut Savalimmiuni niuertarfiuteqarsimasumut atsiullugu Kjølbro-kollegiet-imik taaguuserniarpaa.
Kollegiassaq nutaaq taanna qaqugu naammassineqassanersoq suli nalunarpoq, aningaasaliissuteqartarnermi sanaartortarnerlu maannakkorpiaq niuerfigiuminaattuummata, sanaartortitsiniartorlu suliniumminut atatillugu qularnaatsumik tunngaveqarusulluni.
- Aallartitsisoqarnissaanik oqaaseqarninniit ukiup aappaa avillugu ingerlassagunarpoq. Neriuutigaara tamanna qanittukkut piumaartoq, Niklas Nikolajsen Berlingskemut oqarsimavoq.