Aaja Chemnitz: DK-p Kalaallillu Nunaata naligiinnerulernissaat suli ungasiarpoq
- Ministeriuneq pitsaasumik takutitsivoq, naligiinnerulernissamulli aqqut suli ungasiarpoq. Kalaallit Nunaata Danmarkillu akornanni pissaaneq suli nikingavoq, folketingimi ilaasortaq Aaja Chewmnitz (IA) mininsteriunerup ammaanersiorluni oqalugiaataanut qisuariarluni taamatut oqarpoq.
Ministeriunerup Mette Frederiksenip marlunngornermi Folketingimi ammaanersiorluni oqalugiarnermini oqaatigaa, Kalaallit Nunaatta Danmarkillu akornanni pissutsit ministeriunerunermini naligiinnerulersimasut. Folketingimi ilaasortap Aaja Chemnitzip (IA) ministeriuneq ilaatigut ilumnoornerarpaa.
- Ministeriuneq pitsaasumik takutitsivoq, naligiinnerulernissamulli aqqut suli ungasiarpoq. Kalaallit Nunaata Danmarkillu akornanni pissaaneq suli nikingavoq, tamannalu assersuutigalugu takusarparput, assersuutigalugu illersornissamut tunngasutigut aalajangiisoqarniartillugu Kalaallit Nunaata peqataatinneqanngittarneratigut. Tamanna allanngortissavarput, Aaja Chemnitz ammaanersiorluni oqalugiartoqareersoq oqarpoq, nangillunilu:
- Immikkuualuttut suliassaapput - tassa qanga pisimasut ullumikkullu pisartut - taamaalillutami siunissami naligiinnerulissaagut. Pingaartumik Kalaallit Nunaata nammineq oqartussaaffimminut tunngatillugit nammineq aalajangiisinnaaleriartornerani.
-Kinaluunniit tuniniagaanngitsoq
Mette Frederiksenip naalakkersuisuutitaqarnerani ilaatigut attaveqartarnermut ataatsimiititaliaq pilersinneqarpoq, tassani Danmarkimi, Kalaallit Nunaanni Savalimmiunilu naalakkersuisut nunanut allanut tunngasutigut, sillimaniarnermut illersornissamullu politikki oqaluuserineqartarluni.
Mette Frederiksenip oqaaseqarnermini aamma Amerikamiut præsidenterisimassata Donald Trumpip 2019-imi Kalaallit Nunaannik pisiaqarusunnera oqaaseqarfigaa.
- Kinaluunniit tuniniagaanngilaq, Mette Frederiksen erseqqissaavoq.
Trumpiop pisiaqarusussimanera pillugu apeqqut atuakkami nutaami qanittukkut saqqummiunneqarpoq, atuakkami nassuiarneqarsimasoq, Trumpip allaffeqarfianit Danmarkip USA-mi ambassadeqarfia saaffigineqarsimasoq. Aaja Chemnitz aamma Aki-Mathilda Høegh-Dam atuakkami paasissutissat pillugit Danmarkimi naalakkersuisunut apeqquteqarsimapput.
Oqaluttuaq uteqattaarneqartoq
- Ataqqeqatigiinnerup saniatigut Kalaallit Nunaata Danmarkillu akornanni aamma tatigeqatigiittoqartariaqarpoq, pingaaruteqarporlu paasisaqarfigissallugu, Kalaallit Nunaata peqataaffiginngisaanik Danmarkip USA-llu akornanni tamanna pillugu oqaloqatigiittoqarsimanersoq, Aaja Chemnitz oqarpoq.
Taassuma oqaatigaa, Danmarkimi naalakkersuisut pisortatigoortumik oqaatigisimagaat, pisiaqarusussimaneq pillugu Danmarki USA-lu isumaqatiginninniarsimanngitsut.
Aaja Chemnitzip tassunga atatillugu ilanngullugu oqaatigaa, Danmarkip Kalaallillu Nunaata akornanni tatigeqatigiinnissaq pineqartillugu oqaluttuaq uteqattaarneqartuartartoq:
Eqqoriaaneq: Qinersisoqarnissaa pingasunngornermi nal. 13 nalunaarutigineqassasoq
- Danmarkip Kalaallit Nunaata peqataatinneqarnissaanik eqqumaffiginninnissaa pingaaruteqarpoq. Oqaluttuarisaaneq qiviaraanni arlaannik sammisassaqartuaannarpoq, soorlu assersuutigalugu meeraanerminni misileraataasimasut pillugit suliat, tatigeqatigiinnermik innarliisimasut.
- Kalaallit Nunaat avaqqullugu isumaqatiginninniartoqarsimanngippat aatsaat tatigeqatigiissinnaavugut, Aaja Chemnitz oqarpoq.
Ministeriunerup oqalugiarnissaa sioqqullugu eqqarsaasersuutigineqarluarsimavoq, oqalugiarnerminut atatillugu qinersisoqarnissaanik nalunaaruteqassanersoq. Tamannali pinngilaq. Aaja Chemnitzilli qaqugu qinersisoqarnissaanik nalunaaruteqartoqassanersoq eqqoriarpaa:
- Naatsorsuutigaara pingasunngornermi nal. 13 qinersisoqarnissaanik nalunaaruteqassasoq, taamaanngippatv sisamanngornermi ammaanersiorneq pillugu oqallittoqarnerani tamanna pisinnaavoq. Qineqqusaarnissamut piareersimavunga, Aaja Chemnitz oqarpoq.