Aaja Chemnitz: - Ajutoornikkut toqusut amerlanerulissanngillat
Aaja Chemnitzip (IA) beskæftigelsesministeri Peter Hummelgaard Nunatsinni ajutoornikkut nakkarluni ajunaartoqartarnera pillugu tallimanngornermi ataatsimeeqatigisimavaa. Ministeri tusaaniarsimavoq ingerlaannartumillu iliuuseqarnissamut piareersimalluni.
Folketingimi ilaasortap Aaja Chemnitzip (IA) beskæftigelsesministeri Peter Hummelgaard piffissami kingullermi sanaartorfinni nakkarluni ajunaartoqartarnera oqaluuseriniarlugu ullumi ataatsimeeqatigisimavaa.
Ajutoorneq kingulleq sisamanngornermi pivoq, tassani angut Nuummi sanaartorfimmi stilladsimit tre aamma fem meterip akornanniit nakkarami niua napisimavoq najungasumigullu ajoqusersimalluni.
IA-mi politikkerimut pingaaruteqarluinnarsimavoq, maannakkorluinnaq iliuuseqartoqarnissaata pisariaqartinneqarluinnarneranik Danmarkimi naalakkersuisunut paasitinneqarnissaa.
- Suliffinnik nakkutilliisut iliuuseqarnerunissaat qulakkeertinnagu ajutoornikkut ajunaartoqaqqissanngilaq, Aaja Chemnitz ataatsimeeqateqareernermi oqarpoq.
Piffissaq qaninnerusoq eqqarsaartigalugu
Aaja Chemnitzip oqaatigaa, ministerip maannakkorpiaq iliuuseqartoqarnissaanik paasinnissimasup ataatsimeeqatiginera pitsaasuusimasoq.
Politikkerit ilaatigut oqaluuserisimavaat, sulinermik nakkutilliisussanik nutaanik pilersitsoqassanrsoq, soorlu aamma Suliffinnik Nakkutilliisoqarfimmi sulisut amerlineqarsimanerat oqaluuserisimagaat.
- Nakkutilliisut suliffimmut peqqussuteqarsimanerat pitsaasuuvoq, peqatigitilluguli ajutoortoqartinnagu nakkutilliiartortoqartariaqarpoq - aamma ajutoortarnerit pisartussaanngikkaluarput. Taamaammat suli anguniakkatsinnik angusaqanngilagut, nuannaarutigaarali ministerip tusaaniarsimanera ingerlaannartumillu iliuuseqarnissamut piareersimanera, Aaja Chemnitz oqarpoq.
Piffissaq qaninnerusoq eqqarsaatigalugu - Aaja Chemnitzip oqaatigaa - suliffeqarfinnut nakkutilliiartortoqartanissaa pisariaqartoq aamma ajutoortoqarsinnaanera pinaveersaartinniarlugut paasiniaatitsisoqartariaqartoq.
Piffissaq ungasinnerusoq eqqarsaatigalugu
Taassuma oqaatigaa, sulisitsisut nakkarluni ajutoortoqartarnera unitsinneqassappat immikkut illuinnartunik suliassaqartut.
- Neriuutigaara aqutsisut manna pimoorutissagaat, isumannaallisaanermilu iliuusissat sukaterneqarumaartut, Aaja Chemnitz oqarpoq, nangillunilu:
- Kalaallit Nunaanni sanaartortorpassuaqarpoq, ilaannikkooriarlunilu immaqa sukkavallaamik sanaartortoqartarluni.
Aaja Chemnitzip oqaatigaa, piffissaq ungasinnerusoq eqqarsaatigalugu sulinermi avatangiisit pitsaanerunisssaat, stressertunut iliuuseqartarnissaq suliffimmilu napparsimasoqarpallaartarnera ukkatarineqarnerusariaqartut.
IA-mi politikkerip siusinnerusukkut kaammattuutiginikuuaa, suliffeqarfitsialaat ukkatarineqaqqittariaqartlut, siullertulli toqumik kinguneqartumik nakkarluni ajutoortoqarsinnaanera pinaveersaartinneqassaaq, taanna oqapoq.