Aaja Chemnitz Mette F isumaqatiginninniarfigereerlugu isumalluarpoq
Piumasaqaatitsinnut akuersaarneq paasinninnerlu annertooq. Aaja Chemnitzip siullermeerluni Mette Frederiksenip naalakkersuisunik pilersitsinissaq pillugu isumaqatiginninniarfigereerlugu taama isumaqarpoq.
Aaja Chemnitzip (IA) Folketingimut qinigaaqqeqqammersup periarfissat tamaasa suli ammatippai. Tallimanngornermi ullaap tungaani Mette Frederiksen Marienborgimi aallaqqaasiutaasumik isumaqatiginninniarfigaa, tallimanngornermilu kingusinnerusukkut Lars Løkke Moderaternemeersoq ataatsimeeqatiginiarpaa.
- Qinikkanit 90-init amerlanerusunik siammasinnerusumik amerlanerussuteqartoqarnissaa politikikkut kissaatigineqarpoq, taakku amerlanerussuteqarnissamut ikinnerpaaffissaapput. Taamatut naalakkersuisuutitaqarneq sunnertiasinnaavoq, taamaammat Mette Frederiksenip siammasinnerusumik illuatungeriit akornanni naalakkersuisoqarnissamut kissaataa tapersersorparput.
Aaja Chemnitz piffissami qinigaaffimmi matumani piumasaqaatit qulit naammassiniarniarpai, tallimanngornermilu ataatsimiinnerup kingorna piviusorsiortuunerannik naliliivoq.
- Aallarniutaasumik isumaqatiginninniarnerit aatsaat aallartinneqarput, kisianni anngaasoqarpoq. Uani qinigaaffimmi piumasaqaatitta piviusunngortinneqarnissaannut paasinnittoqarpasippoq, piumasaqaatillu piviusorsiortuutinneqarput.
Tunissuteqartoq
Illersornissaq pillugu isumaqatigiissutigineqartussami kalaallit peqataatinneqarnissaat aamma Aaja Chemnitzip piumasaraa, nunatsinniillu folketingimut ilaasortap oqarnera naapertorlugu iluatsissinnaavoq.
Naalakkersuisunngortussanut piumasaqaateqarnerup aamma Socialdemokraatinik suleqatigeqqinnissaasa saniatigut, Aaja Chemnitz aamma ministeriunerugallartumi isumaqatiginninniartunilu aqutsisumut tunissutissamik nassataqarpoq.
- Mette Frederiksenip sulisimaneranut aamma qinigaaffimmi qaangiuttumi suleqatigiinnermut qujaniarlunga mikisumik tunissuteqarpunga, puisip amianik aaqqateeqqat iikkamut nivinngagassat. Pingaartumik meeqqanut misiliutaasimasunut utoqqatsissuteqarneranut aamma oqaluttuarisaanermik qulaajaanissamut.
Sammisaq avaqqunneqarsinnaanngitsoq
Nunasiaataasimaneq oqaloqatigiinnermut ilaajuaannassaaq, Aaja Chemnitz naqissusiivoq.
- Attaveqarnitsinni oqaluttuarisaaneq peqataatittuaannarparput. Kisianni ullutsinni aamma unammilligassaqarpugut, sinissamilu attaveqarnitta ingerlalluarnissaa.
Taassuma oqarnera naapertorlugu maanna qangalu pisut akornanni oqimaaqatigiissaarinermik nassaarnissaq pingaaruteqarpoq.
- Nunatsinni kinaassuseq initoorujussuusoq qineqqusaarnerup takutippaa. Kinaassusitta tulluusimaarutiginissaa nukittunissaalu pisariaqartipparput. Kisianni aamma naalagaaffik kalaallini inuiaqatigiinni initoorujussuusoq takuarput. Taamaammat kinaassusitsinnik kulturitsinnillu attassinissaq pingaaruteqarpoq, kisianni peqatigisaanik nunarsuup sinneranut Danmarkimullu ammariartussaagut.
Aaqqateeqqat saniatigut Aaja Chemnitzip kalaallit erfalasuat isumaqatiginninniarnermut nassarpaa, taanna kusassaataannaanngilaq.
- Isumaqatiginninniarnerni Kalaallit Nunaata ukkatarineqaannavinnissaa pingaaruteqarpoq, taama nassuiaavoq.