Aaja Chemnitz Larsen oqaloqateqarsinnaasutut nersornaaserneqarnissamut innersuussutigineqartoq
Folketingimi ilaasortaq Aaja Chemnitz Larsen (IA) Innuttaasunik katerisimaartitsisarnermi ukiumoortumik Oqaloqateqarsinnaasutut nersornaaserneqartussatut innersuunneqarsimasunut tallimanut ilaavoq.
Innuttaasunik katerisimaartitsisarneq immaqa politikkerit politikkikkullu soqutisallit allat Roskilde Festivaliattut taaneqarsinnaavoq. Ukiut tamaasa Innuttaasut katerisimaartinneqarneranni polikkerit immikkut tusarnaarsinnaasoq, oqaloqatiginnissinnaasoq ukiullu siuliani aamma Innuttaasut katerisimaartinneqarneranni oqaloqateqartarlunilu sunnertissimasoq nersornaaserneqartarpoq.
Oqaloqateqarsinnaasutut nersornaat politikkerimut oqaloqatiginnissinnaasumut - tassa oqaluinnarani aamma uagutsinnik oqaloqateqarsinnaasumut tunniunneqartarpoq, Innuttaasunik katerisimaartitsisartut nittartakkaminni nersornaat pillugu allapput.
Aaja kalaallini siullersaalluni nersornaaserneqarnissamut innersuunneqarsimavoq, siusinnerusukkut nersornaaserneqarsimasut ilaatigut tassaapput Uffe Elbæk aamma Pia Olsen Dyhr.
- Nuannerluinnartumik tupaallatsinneqarpunga. Nunaga sinnerlugu suliaqartarninnut taamatut nersorinninniarneq tulluussimaarutigaara, Aaja Chemnitz Larsen nersornaaserneqarnissamut innersuussisimaneq pillugu oqarpoq.
Innersuussinermut tunngavilersuutigineqarpoq:
- Aaja Chemnitz Larsen Kalaallit Nunaata Danmarkillu ataqqeqatigiissumik oqaloqatigiittarnissaanik suliaqartarnermi anguniagaqartarpoq - tassa kulturikkut politikkikkullu ataqqeqatigiinnissaq anguniarlugu. Aaja Chemnitz Larsenip Kalaallit Nunaanni inuttut ajornartorsiuteqartoqarnera Naalagaaffeqatigiit tamarmik susassaqarfigigaat oqaatigisarpaa, tusarnaarsinnaaninilu pissutigalugu angusaqarluartarluni.
Oqaloqatigiissinnaaneq Naalagaaffeqatigiinnut immikkut pingaaruteqartoq
- Innersuussisimaneq ammasumik oqaloqatiittoqartarnissaanik ukkataqarnerma maluginiarneqarsimaneranut allannguisinnaaneranullu uppernarsaataavoq. Politikki tassaaginnanngilaq oqalussinnaaneq, aammali tusarnaarsinnaanermut oqaloqatigiinnikkullu aaqqiissutissarsiorsinnaanermut tunngassuteqarpoq. Taamaammat oqaloqateqarsinnaasutut nersornaasigassatut innersuunneqarsimanera uannut immikkut pingaaruteqarpoq, Aaja Chemnitz Larsen oqarpoq.
IA-mi politikkerip erseqqissaassutigaa, Kalaallit Nunaanni Danmarkimilu politikkikkut oqaloqatigiissinnaaneq qitiulluinnartoq, pingaartumik Issittup soqutigineqaleraluttuinnarnerani aaqqiagiittoqalersinnaanera eqqarsaatigalugu.
- Kalaallit Nunaanni sunik anguniagaqarnerput pillugu politikkikkut aalajangersimasumik erseqqissumillu oqaloqatigiissinnaanerup attatiinnarneqarnissaa pingaaruteqarpoq. Tassa oqaloqatigiinnikkut angusaqarnerusarpugut aamma oqaloqatigiinnikkut najugaqarfigisatsinni eqqissisimasoqarnissaanik ineriartortitsinissamillu suliaqarnermi angusaqarnerusarpugut.
Tapersersorneqarluartoq
Innuttaasunik katerisimaartitsineq juunip 17-ianiit 19-ianut ingerlanneqassaaq, arfiningoornermi juunip 19-iani Bornholmimiittumi Allingemi unnukkut naggataarsiortitsinermi nersornaat tunniunneqassaaq.
Aaja Chemnitz Larsen toqqarneqarsinnaavoq UANI.
- Nersornaaserneqarnissamut innersuunneqarnq imminermini ataqqinaataavoq, neriuutigaarali inuit uannik taasiumaartut. Tapersersuisorpassuarnik naapitaqartareerpunga, taamaammat tamassinnut qujanaq. Kalaallit Nunaanni immitsinnut tapersersoqatigiilluarsinnaanerput nersornaaserneqarnissamut innersuunneqarsimasunut allanut danmarkimullut takutissallugu pitsaassagaluaqaaq.
Oqaloqateqarsinnaasutut nersornaaserneqarnissamut ukioq manna innersuunneqarsimasut allat tassaapput Tommy Ahlers, Mona Juul, Stinus Lindgreen aamma Hans Stavnsager.