Aaja Chemnitz Larsen DF-imi politikkerip nunamut qimaasutut isernissamik qinnuteqartartut pillugit siunnersuutaanut isumaqataanngilaq
Folketingimi ilaasortaq Pia Kjærsgaard (DF) nunamut qimaasutut isernissamik qinnuteqarnerminnut itigartitaasimasut pinerluuteqartartullu Kalaallit Nunaannut nassiunneqartarnissaannut piareersimavoq. Aaja Chemnitz Larsen socialdemokraatit qisuaraataannut tupigusuppoq, isumaqarlunilu qisuariaataat naalagaaniarnermik takutitsisuusoq.
Pia Kjærsgaard naapertorlugu Danmarkimut qimaasutut isernissamik qinnuteqarsimallutik itigartitaasimasut Kalaallit Nunaannut nassiunneqartassapput.
Siunnersuutini folketingimi saqqummiunniaraa, BT marlunngornermi allappoq.
- Kalaallit Nunaat danskit naalagaaffiannut ilaavoq, tamatuma ajornartorsiutaanissaa takorloorsinnaanngilara. Kalaallit Nunaammi sermiinnaalluni inoqajuitsuunngilaq, taanna oqarpoq.
Folketingimi ilaasortaq Aaja Chemitz Larsen IA-meersoq tupaaallannanngitsumik siunnersuummut tapersersuinngilaq.
- 2019-imi oqaatigisimasara ullumi oqaatigeqqissavarta. Kalaallit Nunaata danmarkip unammilligassai isumagissanngilai. Nammineq isumagissavarsi. Taamainikkut siunnersuut quianaannarsimavoq, sulilu taamaalluni, Aaja Chemnitz Larsen Sermitsiaq,AG.mut oqarpoq.
Socialdemokraatit akissutaat ernumanartoqartikkaa
- DF-imit taamatut siunnersuuteqartoqarnera Kalaallit Nunaanni mamiatsatsigaluartoq imatut tupaallannanngilaq, DF-imi siusinnerusukkut taamatut siunnersuuteqarnikuuvoq. Oqaatigisariaqarparali Socialdemokraatit Nunanut allanut peqataatsitsiniarnermullu oqaaseqartartuata Rasmus Stokholmip tamatuma isumassarsialatsiaaneranik oqaaseqarnera ernumanartikkakku,Aaja Chemnitz Larsen oqarpoq.
Taanna isumaqarpoq, partiimut Naalagaaffeqatigiinni suleqatigiilluarnermik siuarsaarusuttumut taamatut oqaaseqarneq naleqqutinngitsoq.
- Nunatsinnut nikassaalluni naalagaaniarnermut tamanna takussutissaavoq. Danmarkimi naalakkersuisut anguniagaraat qanimut naligiinnerusumillu Kalaallit Nunaannik suleqateqarnissaq, Socialdemokraatillu oqaaseqartartuata isumassarsiamut taamak eqqumiitsialunilu ingasatsigisumut tapersersuinera Naalagaaffeqatigiinnermut toqqaannartumik ajoqusiisinnaavoq.
- Soournami tamanna pimoorukkaanni naligiissitsilluni peqataatitsisoqarlunilu peqqissaarullugu suliarineqartussaavoq. Nunatsinni naalakkersuisut Kalaallillu Nunaannit sinniisuutitat allat oqaloqatigeqqaarnagit taamatut siunnersuuteqarneq akuersaarneqarsinnaananilu ataqqinninnginneruvoq, taanna naggasiilluni oqarpoq.
Ukiuni arlalinni oqaluuserineqartartoq
Oqallinneq tamanna Danmarkimi nutaajunngilaq. 2018-imi DR1-ip aallakaatitsisarfiani 'Debatten på P1' aallakaatinneqarmat Danmarkimut qimaasutut isernissamut qinnuteqartut, Naalagaaffeqatigiinneq eqqarsaatigineqanngitsuuppat Kangilinnguanut inissinneqarsinnaagaluartut. Tassani Vordingborgimi borgmesteri oqarpoq, Kangilinnguani periarfissat misissorneqassasut.
Danmarkimi civilingeniørip Flemming J. Nielsenup aamma siunnersuutiginikuuaa, Nuummi qimaasunut inissiisarfimmik pilersitsisoqassasoq, taassuma isumaa naapertorlugu tamanna Kalaallit Nunaata aningaasaqarneranut annertuumik iluaqutaassammat.