- Kakkaak takkuttut amerlammata. Taamak amerlatiginissaat naatsorsuutiginngikkaluarpara.

Aaja Chemnitz (IA) illersornissamut isumaqatigiissutissaq pillugu pingasunngornermi innuttaasunik ataatsimiisitsinermut tikilluaqqusisoq nersualaarinnippoq.

Nuummilu Hotel Hans Egedemi inersuarmut takkuttut aamma amerlapput. Tassani innuttaasut 80-t peqataapput, innuttaasullu 20-t Sara Olvsigip, ICC-mi siulittaasup, Rasmus Lohsep, Kalaallit Nunaanni Innuttaasut Sillimaniarnerlu siulittaasuata aamma Michael Zilmer-Johnsip, ukiuni 44-ni Nunanut Allanut tunngasunut ministeqarfimmi kiffartuussereerluni soraarninngorsimasup saqqummiinerinut internetikkut malinnaapput.

LÆS OGSÅ: Innuttaasunik ataatsimiisitsineq: Illersornissaq pillugu isumaqatigiissutissaq oqaluuserineqassaaq

Taakkartorneqartoq kingulleq kunngeqarfiup illersornissamut sillimaniarnermullu politikkikkut misissuisartuinut 2035-p tungaanut kingullermik siulittaasuuvoq, taanna ilaatigut illersornermut isumaqatigiissutissamut tunngaviliisuussaaq.

Paassat imassallu

Naalagaaffiit pissaanilissuit akornanni attaveqatigiinneq ajoraluartumik pitsaanngitsumut ingerlasoq, taassuma tupaallannanngitsumik oqaatigaa. Unammillerneq, tatiginninnginneq aamma pilersuiviit aamma siunissami teknologi aqunnissaat pillugit sakkortuumik unammilleqatigiinnerit takussaapput. Oqalliseriaaseq sakkortusiartuinnarpoq.

- Issittup akerleriikkaluttuinnarnernit aamma nunap immikkoortuata akerleriiffiunnginnissaanik attassiniarneq ajoraluartumik iluatsinngilaq. Naalagaaffiit pissaanilissuit sakkussiorput – aamma ilissinni.

Michael Zilmer-Johns Københavnimit taama nalunaaruteqarpoq. Kisianni Aaja Chemnitzip oqarnera naapertorlugu, illersornissamut isumaqatigiissutissaq paassanut imassanullu kisimi tunnganngilaq.

- Ilissi isummassi qulakkeernissaannut aamma tunngalluinnarpoq. Inuiaqatigiit isumaat illersornissamut isumaqatigiissutissami isumaliutinut ilanngunneqarput, taanna oqarpoq.

Ilisimasat amerlanerusut ujartorneqartut

Taamaammat saqqummiinerit kingorna folketingimi politikeri workshopertoqarnissaanik pilersaarusiorsimavoq, tassani innuttaasut takkuttut tamarmik eqimattanut 12-nut avinneqarlutik qulequttamik tunineqarput, taakku illersornissamut sillimaniarnermullu politikkimut tunngapput, tamatumalu kingorna eqimattani sinniisup suliaq pillugu isummat saqqummiunnissaannut periarfissinneqarput.

Iluatsilluartorujussuuvoq, Aaja Chemnitz aqaguani taama oqarpoq.

Inuusuttut taama amerlatigisut Kalaallit Nunaanni upalungaarsimanermut ilinniarfimmut aamma isummersuuteqarnerat, taassuma pingaartumik pingaartippaa.

Illersornissamut sillimaniarnermullu politikkikkut qanoq inissisimanera pillugu ilisimasanik amerlanerusunik ujartuisoqartoq, IA-mi politikeri paasisaqarpoq.

- Assersuutigalugu Kangerlussuarmi upalungaarsimanermut ilinniarfimmik peqalertussaanera paasisimanngilaat. Isumaqarpunga tamanna pillugu paasissutissiisoqarnerunissaanik pisariaqartitsiffiusoq.

Immap naqqatigut kabelit illersorneqarnerat

Taanna nangippoq:

- Innuttaasut aamma Kalaallit Nunaanni ullumikkut qanoq nakkutilliisoqartiginera nalornissutigaat, Kalaallit Nunaannilu ilisimanngisatsinnik arlaannik pisoqarnersoq paasisaqassalluni pingaaruteqarluinnarpoq, taanna oqarpoq.

Kisianni illersornissamut isumaqatigiissutissamut kissaatit siunnersuutillu Aaja Chemnitzip suut maluginiarsimavai?

Pingaartumik immap naqqatigut kabelit illersorneqarnissaannik innuttaasut kissaateqarnerat pingaartumik ingerlateqqinniarlugu oqaluttuarpoq, minnerunngitsumillu internetip ineriartortinneqarnissaa.

Nutaarsiassat

Siunissami Nuup Saavata isikkussaa pillugu aaqqissuussaq alakkarluarneqartoq

Sapaammi maajip ulluisa 21-anni Nuummi innuttaasunut tamanut Nuup Saavata siunissami qanoq atorneqarnissaa pillugu workshoppertitsisoqarluni paasisitsiniaasoqarpoq aamma...

7.klassit Nuummi eqqakkanik katersillutillu immikkoortiteripput

Maajip ulluisa 23-anni 2023-mi Nuummi atuarfinni arfiniliusuni 7.klassit sullisitik ativaat, Saligaatsoq 2023 ingerlanneqarnissaanut ”kissassiillutik” ikiutaallutik Nuummi eqqakkanik...