Aaja Camp Century pillugu isumasioqatigiinnermut pakatsisoq

Camp Century pillugu ullumi isumasioqatigiinnermi, Aaja Chemnitz Larsenip (IA) apeqqut ataaseq ingammik akissutissarsiffigerusussimavaa. Tassa Nunatsinni Amerikamiut sakkutooqarfiisa iluarsartuussiffigineqarnissaannut kina akisussaasuunersoq.

Atuaruk: Misissuineq nutaaq: Sakkutooqarfik atomreaktorilik sermimit saqqummissaaq

Apeqqullu taanna nunanut allanut ministerip Kristian Jensenip (V) ullumi Kalaallit Nunaat pillugu ataatsimiititaliami isumasioqatigiinnermi akisinnaasimanngilaa.

- Sakkutooqarfiusimasuni iluarsartuussinissamut USA-p imaluunniit Danmarkip akisussaaffigineraa, naalakkersuisut erseqqissumik akisinnaannginnerat uissuumminarpoq, Aaja Chemnitz Larsen (IA) oqarpoq.

Danskit isumaat ersarissoq ujartoraa
Kristian Jensenip (V) paasissutissiissutigaa, kikkut iluarsartuussinissaannut ersarissumik isumaqatigiissuteqartoqarnikuunngitsoq. Tamannalu aalajangerneqannginnerani misissueqqaartoqartariaqarnerarlugu nassuiaavoq.

- Akissut amigartoq soorunami pakatsissutigaara, IA-mi politikeri oqarpoq.

Kalaallit Nunaannut tutsinneqassanngitsoq
Tamatuma saniatigut naqissuserpaa, taamanikkut Qallunaat Nunaat sakkutooqarfiit pillugit isumaqatigiissusiortuusimasoq, taamaattumillu iluarsartuunneqarnissaannut akisussaasuunerlugit.

- Kalaallit Nunaata akisussaaffiginngilluinnaraa naqissuserusuppara, Aaja Chemnitz Larsen oqarpoq.

Illersornissamut isumaqatigiissut nutaaq
USA-p Danmarkillu akornanni illersornissamut isumaqatigiissummi imaluunniit sakkutooqarfiit pillugit isumaqatigiissutini iluarsartuussinissat nassuiaaserneqannginnerat, annertuumik ajornartorsiutaanerarpaa. Illersornissamut isumaqatigiissummi taamaallaat nunanut allanut ministeriaqarfik aamma Amerikamiut aallartitaqarfiat nalornissagunik oqaloqatigiissasut oqaatigineqarpoq.

- Illersornissamut isumaqatigiissut isumaqatiginninniutigeqqinnissaa aamma iluarsartuussinermut akisussaaffik ilanngullugu allanneqarnissaa, Inuit Ataqatigiinni kissaatigaarput, Aaja Chemnitz Larsen oqarpoq.